Referendumga tayyorgarlik qizgʻin

30 aprelda yangilanayotgan Konstitutsiya boʻyicha oʻtkaziladigan referendumga Namangan viloyatida ham  qizgʻin tayyorgarlik koʻrilmoqda. Ayniqsa, aholi oʻrtasida targʻibot-tashviqot keng avj olgan. Bu borada “Adolat” SDP aʼzolari ham faollik koʻrsatmoqda. Viloyat, shahar va tuman kengashlarida referendum boʻyicha shtablar faoliyat koʻrsatmoqda. Ular safdoshlarimizning mazkur yoʻnalishdagi ishlarini muvofiqlashtirmoqdalar, fuqarolarni qabul qilib, savollariga javob qaytarmoqdalar.

Viloyat shtabi joylarda mahalliy kengashlar oʻtkazayotgan tadbirlarni nazorat ostiga olgan. Zarur hollarda joylardagi uchrashuvlarga faollar jalb etilmoqda. Partiya xodimlari, oliy oʻquv yurtlarining oʻqituvchilari safarbar etiladi.

— Har kuni targʻibot-tashviqot ishlari haqidagi maʼlumotlarni umumlashtirib borilmoqda-deydi “Adolat” SDP viloyat kengashi raisi Isroiljon Joʻraev. – Fuqarolar bildirgan fikrlarni berilgan savollarni alohida hisobga olamiz. Kelgusida ular asosida targʻibotni yoʻlga qoʻyishga harakat qilamiz. Bu, hech shubhasiz, faoliyat samaradorligini oshirishga xizmat qiladi.

Targʻibot-tashviqotda barcha mahalliy kengashlar jonbozlik koʻrsatmoqda. Buni viloyat shtabi navbatchisi taqdim etgan maʼlumot tasdiqlab turibdi. Unda kecha oʻtkazilgan tadbirlar topgan.

Masalan, “Adolat” SDP Chust tuman faollari 67-umumtaʼlim maktabi binosida pedagogik jamoa va aholi vakillari bilan uchrashdilar. “Referendum qanday tartibda oʻtkaziladi?” mavzusidagi davra suhbati jarayonida Asosiy qonun loyihasining mazmun-mohiyati haqida ham fikr yuritildi. Tadbir savol-javoblar bilan yakunlandi.

“Adolat” SDP Yangiqoʻrgʻon tuman kengashi raisi Rahimjon Toshmatov esa “yumaloq tepa” mahalla fuqarolar yigʻinida ochiq muloqot oʻtkazildi. “Konstitutsiyaning yagona manbai va muallifi — xalqdir” deb nomlangan tadbirda yuzga yaqin kishi qatnashdi.

Yangilanayotgan Asosiy qonunga bagʻishlangan uchrashuv Norin tuman tibbiyot birlashmasida ham boʻlib oʻtdi. Xalq deputatlari ham boʻlib tuman kengashidagi “Adolat” SDP guruhi aʼzosi Turgʻunoy Toʻychieva maʼruza qildi. Aholi salomatligini saqlash, tibbiy xizmat koʻrsatish bilan bogʻliq masalalarga alohida eʼtibor qaratildi.

Tadbirlar davom etmoqda.

Nurbek ABDULLAЕV,

“Adolat” SDP Namangan viloyat

Kengashi matbuot kotibi.