Rivojlanish yoʻlining mayogʻi

Jamoatchilik tomonidan qizgʻin qoʻllab-quvvatlanayotgan “Oʻzbekiston –2030” strategiyasi mamlakatimizni yaqin yillarda rivojlantirishda katta ahamiyat kasb etadi. Mazkur qonun hujjatidan koʻzlangan asosiy maqsad – islohotlar samaradorligini oshirish, davlat va jamiyatning jadal rivojlanishi uchun zarur shart-sharoitlar yaratish, aholi farovonligiga erishishdan iborat.

Demokratik jarayonlarni tahlil qilish markazi Andijon viloyati hududiy boʻlinmasi va “Adolat” SDP Andijon viloyati kengashi hamkorligida tashkil etilgan “Oʻzbekiston – 2030” strategiyasida belgilangan ustuvor vazifalarni
amalga oshirishda fuqarolik jamiyati institutlarining oʻrni va roli” mavzusidagi davra suhbati ayni shu maqsadga qaratildi.

Unda soʻz olganlar bugungi kunda respublikamizda amalga oshirilayotgan islohotlar, qonun ustuvorligi va huquqiy madaniyat oʻsib borayotgani haqida gapirdilar. Joriy yilda oʻtkazilgan Referendum va Prezidentlik saylovida fuqarolarning siyosiy faolligi yaqqol koʻzga tashlanganini taʼkidladilar. Davlatmiz rahbarining maxsus farmoni bilan tasdiqlangan “Oʻzbekiston – 2030” strategiyasi bu borada yana bir katta qadam boʻldi. U endilikda qonun ustuvorligini taʼminlash, ochiqlik va oshkoralik tamoyillarining taʼsirchan shakllarini joriy etish, davlat hokimiyati organlari faoliyati ustidan samarali jamoatchilik nazoratini oʻrnatishga xizmat qiladi.

Shuni alohida aytish lozimki, strategiya yangi tahrirdagi Konstitutsiya asosida ishlab chiqildi. Inson huquqlari uning asosini tashkil etadi.

Maloxatxon Musayeva, “Adolat” SDP Andijon viloyati kengashi raisi oʻrinbosari:

-Strategiya islohotlar mazmundorligi va samaradorligini oshirishning muhim omili demakdir. Unda belgilangan maqsadlar juda oʻrinli. Bir soʻz bilan aytganda har bir insonning oʻz salohiyatini roʻyobga chiqarishi uchun xizmat qiladi. Koʻrsatilgan vazifalarni amalga oshirish va uning maqsadli koʻrsatkichlariga erishish barchamizning faoliyatimizda eng ustuvor vazifaga aylanishi shubhasiz.

Davra suhbati yakunida “Oʻzbekiston – 2030” strategiyasi doirasida amalga oshiriladigan vazifalar koʻrsatib oʻtildi. Bu oʻz oʻzidan Yangi Oʻzbekistonning taraqqiyoti bilan bogʻliq.

“Adolat” SDP Andijon viloyati kengashi

Matbuot xizmati.