Robaxon Maxmudova Fargʻona viloyatida saylovchilar bilan uchrashdi

Bugun “Adolat” sotsial-demokratik partiyasidan Oʻzbekiston Respublikasi Prezidentligiga koʻrsatilgan nomzod Robaxon Maxmudova mamlakat taraqqiyoti va xalq farovonligiga qaratilgan ustuvor gʻoya va maqsadlari mujassam Saylovoldi dasturini yaqindan tanishtirish maqsadida Fargʻona viloyatning Qoʻshtepa tumanida boʻlib, fargʻonalik saylovchilar bilan uchrashdi.

Uchrashuvda Oliy Majlis Qonunchilik palatasi deputatlari, partiya faollari, talaba-yoshlar, keng jamoatchilik va ommaviy axborot vositalari vakillari ishtirok etdilar.

Dastlab, “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudovaning bosh ishonchli vakili Inomjon Qudratov Prezidentlikka nomzod haqida yigʻilganlarga batafsil maʼlumot berdi.

Shundan soʻng, Robaxon Maxmudova saylovchilar bilan yuzlashar ekan, Saylovoldi dasturidan vatanimiz taraqqiyoti yoʻlida huquqiy davlat qurish, ijtimoiy adolatni va milliy iqtisodiyotimizning barqaror oʻsishini taʼminlash, ilm-fan, innovatsiyalar va taʼlim sohasini barqaror rivojlantirish, aholi salomatligini muhofaza qilish kabi ulugʻvor maqsadlar oʻrin olganligini taʼkidlab oʻtdi.

Shuningdek, mamlakat iqtisodiyotining barqaror rivojlanishini taʼminlash yoʻlida jamiyatning innovatsion, intellektual salohiyatini roʻyobga chiqarish va inson kapitalini rivojlantirish kabi dolzarb masalalarda aniq maqsad va vazifalar taklif etilayotganligi qayd etildi.

Nomzodning Saylovoldi dasturida shuningdek, “Aqlli tibbiyot” tizimini shakllantirish, jamiyatda oʻqituvchilar maqomini oshirish, subsidiyalar berish tizimini yanada takomillashtirish va maqsadli ishlatilishi ustidan jamoatchilik nazoratini kuchaytirish, bojxona va soliq imtiyozlarini takomillashtirish, imtiyozlarni aniq sohalarga berish, hududlar oʻrtasidagi iqtisodiy bir xil oʻsishni taʼminlash, barcha tuman va shaharlarni bir maromda rivojlantirishga qaratilgan gʻoyalar ilgari surilayotganligi aytib oʻtildi.

Jarayonda nomzodning Saylovoldi dasturi yuzasidan Robaxon Maxmudovaning Fargʻona viloyatidagi ishonchli vakili Gulbahor Saidgʻaniyeva, xalq deputatlari Fargʻona tuman kengashi deputati N.Isaqov va partiya faoli A.Nabiyevlar soʻz olib, taklif etilayotgan ustuvor maqsad va gʻoyalar xalq farovonligi va Vatan ravnaqiga xizmat qilishini eʼtirof etar ekanlar, tadbir ishtirokchilarini 9-iyul kuni boʻlib oʻtadigan Prezident saylovida nomzodni qoʻllab-quvvatlashga chaqirdilar.

Uchrashuv yakunida Prezidentlikka nomzod Robaxon Maxmudova saylovchilarning savollariga batafsil javob berdi.

Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudovaning saylovchilar bilan uchrashuvlari davom etadi.

“Adolat” SDP

Farg’ona viloyat кенгаши  Matbuot xizmati.