Sabrlarga yoʻgʻrilgan jasorat

Joriy yilning 22-28 oktyabr kunlari Xitoyning Xanchjou shahrida oʻtkazilgan IV Para Osiyo oʻyinlarida muvaffaqiyatli ishtirok etgan matonatli para atletlarimiz 25 ta oltin, 24 ta kumush va 30 bronza, jami 79 ta medalni qoʻlga kiritib, yurtimizga qaytdilar.

Oʻzbekistonlik matonatli sportchilarimiz orasida qoʻshtepalik Yorqinbek Odilovning borligi barchamizni quvontirdi. Yorqinbek Odilov para yengil atletikaning erkaklar oʻrtasida oʻtkazilgan F57 klassida nayza uloqtirish dasturida ishtirok etib 47.72 metr natija bilan kumush medalni qoʻlga kiritdi.

Yorqinbekni bu yutuqlari bilan qutlash uchun ustozlari mahalladoshlari u istiqomat qilayotgan Shomirza MFYdagi xonadoniga tashrif buyurishmoqda. Tuman hokimi Ilyos Novikov va sektor rahbarlari ham Yorqinbekni erishgan gʻalabasi bilan tabriklashib, unga tuman hokimligining esdalik sovgʻalarini topshirishdi.

-Insonda eng avvalo iroda mustahkam boʻlishi zarur. Har qanday sharoitga qaramay oldimizga ulkan maqsadlarni qoʻyishimiz va unga erishish uchun harakat qilsak albatta eta olishimizni oʻz hayotim misolida koʻp bor iqror boʻldi. Respublika, Osiyo, xalqaro musobaqalarda koʻp bor gʻoliblikni qoʻlga kiritdim. Bu yutuqlarim salmogʻi ota –onam va yaqinlarimni mehri va duolari va astoydil mehnatim natijasi, deb bilaman. Bugun xonadonimizga turli davlat va jamoat tashkilotlari rahbarlari kelib yoʻqlashyapti. Yutuqlarim orqali xalqimizning yuksak eʼtirofiga sazovor boʻlyapman. Men vatanim dovrugʻini oshirishdan aslo charchamayman, -deydi Yorqinbek Odilov samimiy muloqotlarda.

Biz ham sabrlarga yoʻgʻrilgan jasorat va matonat sohibiga hamisha omad yor boʻlishini tilaymiz.

Ilhomjon Qosimjonov,

“Аdolat” SDP Qoʻshtepa tuman Kengashi raisi.