Salomatlikni muhofaza qilishda aqlli tibbiyotning oʻrni

Oʻzbekiston “Adolat” SDP Mirishkor tumani Kengashi tomonidan tuman tibbiyot birlashmasi tadbirgohida “Aqlli tibbiyot, tibbiyot sohasidagi islohotlar” mavzusida tadbir tashkil etildi. Unda deputatlar, partiya faollari, tibbiyot xodimlari va keng jamoatchilik vakillari qatnashdi.

Tibbiyot sohasini isloh qilish bugungi kunning dolzarb vazifasi. Bu haqda yangi Konstitutsiyamizda ham alohida modda oʻrin olgan. Xalqimiz bepul va malakali tibbiy xizmat olish huquqi belgilab qoʻyilgan.

Bugun boʻlib oʻtgan tadbirda ham shular xususida soʻz yuritildi. Unda soʻzga chiqqanlar barcha sohalar qatori tibbiyot tizimi oldida ham gʻoyat murakkab vazifalar turganligini alohida qayd etishdi.

-Odamlar salomatligi uchun kunu tun xizmat qilib kelayotgan har bir tibbiyot xodimi mahorati, bilim va malakasini doimiy oshirib borishi, yangi zamonaviy texnologiyalar va davolash usullarini har tomonlama puxta egallashi zarur,-dedi xalq deputatlari viloyat Kengashi deputati Qoʻyli Narzullayev.- Tibbiyot tizimini rivojlantirish, soha xodimlarining samarali mehnatini munosib qadrlash,bilimli, malakali kadrlar tayyorlash, chet davlatlardagi tibbiyot markazlari va oliygohlari bilan ilmiy-amaliy hamkorlikni kuchaytirish zarur.

-Mamlakatimizda Prezidentimiz boshchiligida tibbiyot sohasini xalqqa yaqinlashtirish, uni isloh qilish borasida keng qamrovli ishlar olib borilyapti,- dedi xalq deputatlari tuman Kengashi deputati Abujabbor Kenjayev.- Xalqimiz tibbiy xizmatdan har tomonlama bahramand boʻlishi uchun zamonaviy binolar barpo etildi. Markazdan tortib olis qishloqlargacha tibbiyot muassasalar endilikda malakali shifokorlar va asbob uskunalar bilan taʼminlangan. Tibbiyot xodimlari vaqti-vaqti bilan xorijiy davlatlarda malaka oshirib qaytishyapti.

Shuningdek tadbirda partiya faollari Xurshid Qurbonov, xalq deputatlari tuman Kengashi deputati Nazira Toʻrayeva va boshqalar ham oʻz maʼruzalari bilan ishtirok etdilar. Tadbirda “aqlli tibbiyot” ni yanada rivojlantirish sohaga axborot va innovatsion texnologiyalarni keng joriy etish yuzasidan tumanda amalga oshirilayotgan ishlar xususida gapirdilar.

Inson salomatligi jamiyatning bebaho boyligi hisoblanadi. Tibbiyot xodimlari esa ana shu boylikning fidoyi posbonlaridir. Yurtimizda soha taraqqiyoti uchun islohotlar koʻlami kengaytirilyapti.

To‘lqin Xidirov,

“Adolat” SDP Mirishkor tuman Kengashi raisi.