Samarali, ixcham va xalqchil davlat boshqaruvi - taraqqiyotimiz asosi

Shu kecha kunduzda mamlakatimiz aholisi 30-aprel kuni boʻlib oʻtadigan referendumga har tomonlama tayyorgarlik koʻrmoqda. Davlatimiz ijtimoiy-siyosiy hayotida muhim oʻrin tutuvchi Yangi tahrirdagi Konstitutsiyamiz targʻiboti keng koʻlamda tashkil etilyapti. Bu borada ayniqsa, Oliy Majlis Qonunchilik palatasi deputatlarining xalq ichiga kirib, baxtimiz Qomusining har bir moddasi mazmun-mohiyatini toʻgʻri tushuntirishayotgani elimizga maʼqul kelayotir.

Oliy Majlis Qonunchilik palatasidagi “Adolat” SDP fraksiyasi aʼzosi Abdugʻani Umirov Nishon va Qarshi tumani saylovchilari oʻrtasida Konstitutsiyaga kiritiladigan oʻzgarishlar va normalar haqida tushuntirish ishlarini olib bordi. Nishon tumanidagi 12-sonli musiqa maktabida boʻlib oʻtgan uchrashuvda deputat Konstitutsiyaga ijtimoiy davlatga xos yondashuvlar taʼlim sohasiga oid koʻplab modda va normalar ham oʻz ifodasini topayotganligini qayd etdi.

-Taʼlim va ilm-fanga oid normalar qariyb 2 barobarga oshmoqda,- dedi Abdugʻani Umirov.- Biz ijtimoiy davlat barpo etar ekanmiz, Konstitutsiyamiz ham shunga mos boʻlmogʻi zarur. Hozirda Oliy taʼlim muassasalariga grantlar soni 2 baravar koʻpayib, 40 mingtaga yetdi. Magistratura yoʻnalishi uchun esa 5 baravar koʻpaydi. Yana bir muhim yangilik xususida toʻxtalmoqchiman. Davlat har bir oilaning toʻlaqonli rivojlanishi uchun ijtimoiy, iqtisodiy, huquqiy va boshqa shart-sharoitlar yaratishi konstitutsiyaviy mustahkamlanmoqda. Konstitutsiya loyihasida Oʻzbekiston – huquqiy davlat, deb belgilanmoqda. inson huquq va erkinliklarini taʼminlash davlatning oliy maqsadi, deya eʼlon qilinar ekan, unda inson huquqlariga oid normalar 3 baravardan ortiqqa oshmoqda.

Shuningdek, deputat Jalajin MFY hududidagi 9-maktab, Ulugʻbek MFY hududidagi 7-sonli IDUM, Qarshi tumanidagi Nukrobod MFY hududidagi 8-umumtaʼlim maktabi tadbirgohida ham pedagoglar, mahalla faollari va soliq inspeksiyasi xodimlari, tuman gaz taʼminoti korxonasi ishchi muhandis va keng jamoatchilik vakillari bilan uchrashib, taʼlim olish huquqi va imkoniyati kengaytirilayotgani, oʻqituvchilar konstitutsiyaviy maqomga ega boʻlayotganini toʻplanganlarga mufassal tushuntirdi.

Nodir Isomov,
Oliy Majlis Qonunchilik palatasi deputati yordamchisi.