Samarqandda “turizm ipotekasi” dasturi asosida 100 ta yangi sayohat manzillari tashkil etiladi

Samarqand – yer yuzining sayqali, Sharq gavhari, qadimiy va hamisha navqiron, allomalarga beshik bo‘lgan zamin. Bu zamin ming yillar davomida Sharq va G‘arbni tutashtirib, jahon sivilizatsiyalarini bir-biriga yaqinlashtirib, dunyo madaniyatlarini boyitib kelgan.

Buyuk Ipak yo‘lining chorrahasida joylashgan, jahon sivilizatsiyasi markazlaridan biri bo‘lgan bu diyor keyingi yillarda dunyoning yirik madaniyat, ma’rifat, siyosiy muloqotlar markaziga aylanmoqda.

So‘nggi yillarda qisqa muddatda viloyatda misli ko‘rilmagan islohotlar bo‘ldi. Nafaqat viloyat markazi, balki eng olis qishloqlar ham mutlaqo zamonaviy qiyofa kasb etdi. Odamlarni yillar davomida o‘ylantirib kelgan yo‘l, ichimlik suv, elektr energiyasi bilan bog‘liq masalalar yechildi.

Prezidentimizning viloyatga so‘nggi yillardagi tashriflarida viloyat salohiyatini yanada yuksaltirish borasida bergan taklif va tavsiyalar asosida hududda bir qator bunyodkorlik ishlari amalga oshirildi. Xususan, Samarqand xalqaro aeroporti modernizatsiya qilindi, eshkak eshish kanali atrofida xalqaro turizm markazi bunyod etildi.

Bu jarayonda infratuzilmani yangilash, aholi uchun qulay bo‘lgan zamonaviy turar joy massivlari bunyod etish, ish o‘rinlari yaratish ishlari ham amalga oshirilmoqda. Davlatimiz rahbari tashabbusi bilan 200 gektardan ortiq maydonda bunyod etilgan “Buyuk ipak yo‘li” xalqaro turizm markazi qisqa fursat ichida Samarqandning yangi tashrif qog‘oziga aylandi.

Keyingi yillarda viloyat izchil rivojlanmoqda. Ayniqsa, tadbirkorlik va fermerlikni qo‘llab-quvvatlash, ularning erkin va samarali faoliyat yuritishi uchun berilayotgan imkoniyatlar, yaratilayotgan sharoitlar ko‘lami nihoyatda kengaydi. Natijada ular aholi bandligini ta’minlash barobarida o‘z mahsulotlarini nafaqat ichki bozorga chiqarmoqda, balki xorijga ham eksport qilayotir.

Samarqand shahridagi “Aziya metall prof” mas’uliyati cheklangan jamiyatida 2018-2022 yillarda xitoylik hamkorlar bilan birgalikda umumiy qiymati 110 million dollarlik loyihalar amalga oshirilgan. Bu mablag‘ning 33 million dollari to‘g‘ridan-to‘g‘ri xorijiy investitsiyadir.

Dastlab, 2018 yil dekabrda rux va polimer bilan qoplangan metall listlar tayyorlash boshlangan bo‘lsa, ikkinchi bosqichda, 2021 yildan metall quvurlar va profillar ishlab chiqarish yo‘lga qo‘yildi. Ayni paytda korxonada yarim million nafardan ortiq ishchi mehnat qilmoqda.

Prezidentimiz ta’lim maskanlaridagi sharoitlar, yangi inshootlar, sanoat korxonalari va xizmat ko‘rsatish loyihalari ko‘zdan kechirish, xalq bilan ochiq muloqot qilish maqsadida shu yil 25 avgust kuni Samarqandda bo‘ldi. Ushbu tashrif viloyat ahlining kayfiyatini yanada ko‘targani, ularni faollikka chorlagani ayni haqiqat.

Samarqand viloyatini ijtimoiy-iqtisodiy rivojlantirish hamda yil yakuniga qadar amalga oshirilishi lozim bo‘lgan asosiy vazifalar bo‘yicha o‘tkazilgan yig‘ilishda mahallalarda tadbirkorlik va dehqonchilikni qo‘llab-quvvatlash, uzum va pista yetishtirishni ko‘paytirish, serqatnov yo‘llar bo‘yida xizmat ko‘rsatish sohasida aholini ishli qilish zarurligi ta’kidlandi.

Xususan, o‘tgan yilgi qish mavzumida elektr energiya ta’minotida bo‘lgan uzulishlardan to‘g‘ri xulosa chiqarib, Oqdaryo va Pastdarg‘omdagi podstansiyalarni yangilash, yil yakunigacha Kattaqo‘rg‘on tumani va Samarqand shahrida quvvati 250 megavatt bo‘lgan 2 ta quyosh elektr stansiyasini ishga tushirish vazifasi qo‘yildi.

Samarqand viloyati ulkan turizm salohiyatiga ega. Shundan kelib chiqilsa, viloyatda turizm sohasida 20 mingta doimiy ish o‘rni yaratish va eksportni 500 million dollarga yetkazish imkoniyati bor. Buning uchun jozibador dasturlarni ko‘paytirish, yo‘llarni va jamoat transportini qulay qilish zarur. Bu borada turizm salohiyati yuqori 100 ta mahalla va qishloqda “turizm ipotekasi” dasturi asosida yangi sayohat manzillari ochilishi ayni muddaodir.

Mubolag‘asiz aytish mumkinki, bugun Samarqandda amalga oshirilayotgan ulkan qurilish-bunyodkorlik ishlari, islohotlar yagona maqsad – xalqimiz uchun munosib sharoit yaratish, turmush farovonligini oshirishga, umuman, inson manfaatlariga qaratilgan. Birgina “Obod qishloq” va “Obod mahalla” dasturlari asosida viloyatdagi ko‘plab qishloq va mahallalar qiyofasi, infratuzilmasi o‘zgarib, aholi uchun zamonaviy turmush sharoitlari yaratilayotir.

Xulosa qilib aytganda, viloyatda amalga oshirilayotgan bunyodkorlik va iqtisodiy loyihalar viloyat ahlining turmush farovonligini yaxshilashda hamda aholining munosib mehnat haqqiga ega bo‘lgan ish o‘rnilari bilan ta’minlanishida muhim ahamiyat kasb etadi. Davlatimiz rahbarining bu galgi tashrifi esa viloyatni yanada rivojlantirish, hududning beqiyos imkoniyatlarini yuzaga chiqarishga xizmat qiladi.

Maxfirat XUSHVAQTOVA,

Oliy Majlis Qonunchilik palatasi deputati