Saylov okruglari bir mandatli va yagona saylov okruglariga ajratilmoqda

Oliy Majlis Qonunchilik palatasidagi “Adolat” SDP fraksiyasining yig‘ilishida “O‘zbekiston Respublikasining ayrim qonun hujjatlariga saylov va referendum o‘tkazish tartibini yanada takomillashtirishga qaratilgan o‘zgartirish va qo‘shimchalar kiritish to‘g‘risida”gi Konstitutsiyaviy qonun loyihasi ko‘rib chiqildi.

Ta’kidlanganidek, keyingi yillarda demokratik islohotlarni chuqurlashtirish va mamlakatni modernizatsiya qilish maqsadida parlament hamda siyosiy partiyalarning rolini kuchaytirish, saylov va referendum o‘tkazish tartibini yanada takomillashtirishga qaratilgan keng ko‘lamli islohotlar amalga oshirildi.

Taklif etilayotgan Konstitutsiyaviy qonun loyihasida Saylov kodeksiga hamda 7 ta qonunga o‘zgartirish va qo‘shimchalar kiritish nazarda tutilmoqda. Xususan, saylov kodeksiga Qonunchilik palatasi saylovini aralash (majoritar, proporsional) saylov tizimi asosida o‘tkazish taklif etilmoqda. Jumladan, saylov okruglari bir mandatli va yagona saylov okruglariga ajratilmoqda.

Shuningdek, yagona saylov okrugida deputatlikka nomzodlar siyosiy partiyalar tomonidan nomzodlar ro‘yxati asosida taqdim etilishi nazarda tutilyapti. Partiya ro‘yxatini ro‘yxatga olish muddatlari va tartibotlari belgilanmoqda.

Konstitutsiyaviy qonun loyihasi bilan “O‘zbekiston Respublikasining referendumi to‘g‘risida”gi Qonunga ham o‘zgartirish va qo‘shimchalar kiritish taklif etilmoqda. Xususan, referendum tashkil etish va o‘tkazishda referendum okruglarini tuzish tartibi bekor qilinib, mazkur vazifa Qoraqalpog‘iston Respublikasi Markaziy saylov komissiyasi, viloyatlar va Toshkent shahar hududiy saylov komissiyalari, tuman va shahar saylov komissiyalari, uchastka saylov komissiyalari tomonidan amalga oshirilishi belgilanmoqda.

Mazkur Konstitutsiyaviy qonun loyihasining qabul qilinishi natijasida referendum va saylov to‘g‘risidagi qonunchilik yangi tahrirdagi Konstitutsiyaga muvofiqlashtiriladi, Markaziy saylov komissiyasi, hududiy, tuman va shahar saylov komissiyalarining vakolatlari aniqlashtirilib, Qonunchilik palatasi deputatlari korpusini shakllantirishning majoritar-proporsional shakliga asoslangan saylov tizimi joriy etilishining huquqiy asoslari yaratiladi.

E’tiborli jihati, ushbu Konstitutsiyaviy qonun siyosiy partiyalar va deputatlar o‘rtasidagi aloqalarning mustahkamlanishiga, partiyalar mavqei hamda saylov organlarining professionallik darajasi yanada oshishiga xizmat qiladi.

Yig‘ilishda deputatlar tomonidan partiya pozitsiyasidan kelib chiqqan holda ko‘tarilgan savollarga tashabbuskorlar tomonidan atroflicha javoblar olindi. Deputatlar qonun loyihasining dolzarbligini, berilgan takliflar inobatga olinganini hisobga olib, uni ma’qulladilar.

Yakunda kun tartibidagi masalalar yuzasidan fraksiyaning tegishli qarori qabul qilindi.