Saylov shtabimiz saylovchilarga munosib xizmat qilmoqda

Saylovoldi tashviqot tadbirlari qizgʻin davom etayotgan shu kunlarda Oʻzbekiston “Adolat” SDP Xorazm viloyat Kengashi saylov shtabi hamda 13 ta tuman, shahar saylov shtablari faol ish olib bormoqda.  

Xorazm viloyat kengashi saylov shtabiga tashrif buyurayotgan saylovchilar, turli mavzularda murojaat etishmoqda,

nomzodning saylovoldi dasturida koʻrsatilgan ijtimoiy soha, xususan, tibbiy xizmat, taʼlim va boshqa yoʻnalishlar boʻyicha kengroq maʼlumotlarga ega boʻlishni bildirishmoqda hamda

ijtimoiy-iqtisodiy sohaga oid takliflari bilan murojaat etmoqdalar.

Oʻzbekiston koʻzi ojizlar jamiyati Xorazm viloyat birlashmasi raisi Erkin Roʻziboyevning murojaati qanoatlantirildi va u rahbarlik qilayotgan jamoa aʼzolariga nomzodning braуl yozuvida yozilgan saylovoldi dasturi, nomzodni targʻib qiluvchi tarqatma materiallar hamda partiyaning esdalik sovgʻalari   yetkazib berildi.  

Shuningdek, Saylov shtabi aʼzolari har bir saylovchining murojaatiga partiya nomzodining saylovoldi dasturidan kelib chiqqan holda asosli javob qaytarishga harakat qilishmoqda. Saylov shtabimizning eshigi saylovchilar uchun doimo ochiq, Oʻz faoliyatimizni saylov qonunlari doirasida bosqichma-bosqich amalga oshiryapmiz. Xususan, nomzodning 553 ta saylov uchastkalaridagi kuzatuvchilari roʻyxati toʻliq shakllantirildi va ularning siyosiy, huquqiy bilimlari oshirildi, vazifalari tushuntirildi va Oʻzbekiston Respublikasi Markaziy saylov komissiyasi tomonidan chop etilgan “Siyosiy partiyalardan kuzatuvchilar uchun eslatma” nomli kitoblar toʻliq taʼminlandi.

Vohamizning shahar va tumanlaridagi markaziy koʻchalariga partiya nomzodini targʻib qiluvchi 30 ta maxsus bannerlar oʻrnatildi.

Partiyamizdan nomzod Robaxon Maxmudovaning saylovoldi dasturi, nomzodning viloyatdagi ishonchli vakil uchrashuvlari, saylovoldi targʻibot tadbirlari toʻgʻrisidagi maʼlumotlar viloyatda faoliyat yuritayotgan ommaviy axborot vositalariga yetkazib berildi.

Ommaviy axborot vositalari va elektorat bilan saylov kampaniyasi jarayonida faol hamkorlik qilishimiz saylovni ochiq-oshkora, demokratik tamoyillar asosida oʻtishi va oʻz partiyamizning siyosiy pozitsiyasini yanada mustahkamlab olishda xizmat qilmoqda.      

Taʼkidlash joizki, saylov shtabi saylovga oid barcha huquqiy hujjatlar, qoʻllanmalar, partiya dasturiy gʻoyalarini va Prezidentlikka nomzod Robaxon Maxmudova va uning dasturini targʻib qiluvchi targʻibot materiallari hamda zamonaviy axborot-kommunikatsiya vositalari bilan jihozlangan.

Partiyaning Bogʻot tuman Kengashidagi saylov shtabimizga oʻz istaklarini bildirib kelayotgan yoshlarning Vatanimiz taqdiriga boʻlgan daxldorligini koʻrib havasing keladi, — deydi partiyaning Bogʻot tuman Kengashi raisi Qahramon Rahimov. –Quvonarlisi, partiyaga aʼzo boʻlish istagini bildirayotgan yoshlarning soni ortib bormoqda.

Saylov jarayonlariga boʻlgan qiziqishim sabab, partiyaning tuman Kengashidagi saylov shtabiga keldim, — deydi “Oq tepa” mahalla Yoshlar yetakchisi Suxrobjon Ahmedov. – Partiya faollarining meni samimiylik bilan kutib olishi va har bir qiziqqan savolimga samimiyat bilan javob berishlari partiyaga boʻlgan mehrimni yanada oshirdi. Nomzodning saylovoldi dasturi toʻgʻrisidagi tushunchalarimni mustahkamlab oldim va partiyaga aʼzo boʻlish istagim ham joyning oʻzida hech qiyinchiliklarsiz amalga oshdi. Yurtim kelajagi uchun bor kuch-gʻayratimni safarbar etishni maqsad qildim.

Bir soʻz bilan aytganda, saylov shtabimiz saylovchilarga xizmat qilishi, saylov jarayonlarida targʻibot ishlarini samarali olib borishi orqali kutilayotgan saylovda partiyamizning munosib oʻringa ega boʻlishida ahamiyat kattadir.

                                                                                                  Zamira Abdullaeva,

           “Adolat” SDP Xorazm viloyat Kengashi matbuot kotibi.