Yangiliklar 867
Shaxsning sudlangani uning qarindoshlari huquqlarini cheklash uchun asos bo‘lmaydi
Guliston tuman markazida joylashgan Madaniyat bo‘limida "Konstitutsiya meniki, seniki, bizniki. Konstitutsiya o‘zimizniki!" shiori ostida targ‘ibot tadbiri o‘tkazildi.
Oliy Majlis Qonunchilik palatasi deputati Inomjon Qudratov Bosh qomusimizning mamlakatimiz hayotida tutgan o‘rni, unga kiritilayotgan yangi normalar haqida to‘xtalib o‘tdi.
Xususan, o‘tgan davr mobaynida Konstitutsiyaviy qonun loyihasi ustida qizg‘in ish olib borilgani, qonun loyihasi yuzasidan 220 mingdan ziyod takliflar kelib tushgani aytildi. Yangilinayotgan Konstitutsiya – xalqimizning orzusidagi ijtimoiy va adolatli Yangi O‘zbekiston va Uchinchi Renessans asosini yaratishning mustahkam poydevori hisoblanishi qayd etildi.
—Bugungi kunda tayyorlangan Konstitutsiyaviy qonun loyihasi bilan amaldagi Konstitutsiyamizning moddalari 128 tadan 155 taga, uning normalari esa 275 tadan 434 taga ko‘paymoqda, — deydi deputat I.Qudratov. — Xususan, Konstitutsiyamiz qariyb 65 foizga yangilanmoqda. Amaldagi 128 ta moddadan 91 tasiga konseptual o‘zgartirishlar kiritilmoqda.
Shu bilan birga, Bosh qomusimizda “shaxsning sudlanganligi va bundan kelib chiqadigan huquqiy oqibatlar uning qarindoshlari huquqlarini cheklash uchun asos bo‘lmasligi” ham belgilanmoqda. Kiritilayotgan ushbu qoida xalqimizning ko‘p yillar davomida boshiga tushgan tashvish, ya’ni zarracha aybi yo‘q shaxsga nisbatan aybdor sifatida qarash kabi sobiq tuzumdan qolgan sarqitlardan holi etishga qaratilgan.
Tadbirda tumandagi korxona va tashkilotlar rahbarlari, mahalla raislari, xotin-qizlar va yoshlar ishtirok etib, o‘z fikr-mulohazalarini bildirdi.
Fikringizni qoldiring