Shijoatli, siyosatchi “mehribon opa”

Avval xabar berganimizdek, “Adolat” sotsial-demokratik partiyasi Xorazm viloyat Kengashi tashabbusi bilan koʻp yillardan buyon yurtdoshlarimiz tomonidan iliq kutib olinayotgan partiyaning “Eʼzoz va eʼtibor” loyihasi doirasida, partiyamizning rivoji yoʻlida shijoat bilan mehnat qilib, yurtimiz taraqqiyotiga munosib hissa qoʻshib kelayotgan partiyamiz faxriylari, turli sohalarda xizmat qilayotgan partiyamiz faollarining namunali va tajribali hayot yoʻllari va faoliyatini ommaviy axborot vositalari, internet- ijtimoiy tarmoqlari orqali yurtdoshlarimiz eʼtiboriga havola qilib kelmoqdamiz.

Loyiha ijrosini “Xorazm teleradiokompaniyasi”ning “Nafosat” koʻrsatuvi rahbari, jurnalist, partiyamizning faoli Gulsanam Mammanova bilan hamkorlikda olib borayotganimiz, loyiha maqsadini toʻla va samarali amalga oshirishda ahamiyati katta boʻlmoqda.

Loyihamizning galdagi qahramoni partiya Xorazm viloyat Kengashi bosh mutaxassisi, bir necha kitoblar muallifi, tajribali ijodkor va siyosatchi hamkasabamiz Gulora Ismoilovaning hayoti va faoliyati toʻgʻrisida tashkil etildi.

Gulora Ismoilava 2018-yilga qadar koʻp yillar davomida Urganch shahridagi bir qator mahallalarda mahalla maslahatchisi vazifasida faoliyat olib borgan. Uning ishga boʻlgan masʼuliyati va tajribasini eʼtiborga olib, soha rahbariyatining topshirigʻiga asosan, koʻp muammoli, sust faoliyat olib borayotgan mahallalarni rivojlantirish maqsadida, G.Ismoilova koʻplab mahallalarda ishlashiga toʻgʻri kelgan va rahbarlarning ishonchini oqlashga, xalqimiz eʼtiboriga sazovor boʻlgan.

G.Ismoilova 2018-yilda partiya faollarining taklifi bilan partiya Xorazm viloyat Kengashida oʻz faoliyatini boshlaydi va koʻp oʻtmay oʻzining goʻzal fazilatlari bilan jamoaning hurmat eʼtiboriga tushadi.

  Barnogul Abdullayeva, Yangiariq tuman Kengashi raisi:

-Ustozimiz — Gulora Ibalullayevani ishga boʻlgan yondashuvi, uning tartib-intizomi, mehribonligi, har qanday vaziyatlarda bosiqlik bilan javob berishi diqqatimni tortgan. Uni hatto “Mehribon opa” deb ham murojaat etamiz. Uning koʻpgina goʻzal fazilatlari jamoamizning ahil boʻlib shakllanishida xizmat qilmoqda.

Gulora Ismoilova, suhbatdosh:

-Mahallalarda maslahatchi boʻlib ishlayotgan paytim “Adolat” SDPga boʻlgan hurmatim juda cheksiz boʻlgan. OAV orqali partiya faoliyatini kuzatib borar edim. 2012-yilda partiyaga aʼzo boʻlish istagim amalga oshdi. Hatto partiya faollarining jonkuyarligini, yuqori darajadagi tadbirlarni koʻrib, partiyada ishlash orzum ham paydo boʻldi. Yillar oʻtib orzum amalga oshdi. 2019-yilda partiya tomonidan tashkil etilgan “Yilning eng adolatli ayoli” respublika koʻrik-tanlovining Xorazm viloyat bosqichida gʻolib boʻlib, Respublika bosqichida faol ishtirok etganim hayotimda tub burilish yasadi. Inson oʻz sevgan jamoasi va oʻz sevgan kasbida ishlasa, baxtni toʻla — toʻkis his qilar ekan. Ishimni, jamoamni juda yaxshi koʻraman. Ular hayotimni asosiy boʻlagiga aylangan. Men baxtli, siyosatchi ayolman desam, xato boʻlmaydi. Bor kuchim va qobiliyatimni partiyam rivoji uchun safarbar etaman.

Darhaqiqat, suhbatdoshimizning oiladagi oʻrni, nabiralariga mehribon buvi, farzandlariga mehribon ona, jamoadoshlariga adolatli va tajribali ustoz sifatida ehtiromga loyiq boʻlib kelmoqda. Jamiyatda oʻzining munosib oʻrniga ega, xalqimiz dardi bilan yashayotgan qahramonimiz erishgan yutuqlarini qanchalar eʼtirof etsa, arziydi.

Bir soʻz bilan aytganda, Gulora Ismoilovadek, jonkuyar, fidoyi partiyadoshlarimiz, hamyurtlarimiz   bor ekan, Yangi Oʻzbekistonimizning kelajagi porloq, tutgan yoʻli oydin ekani muqarrardir.

                                                                                      Zamira Abdullayeva,

     “Adolat” SDP Xorazm viloyat Kengashi matbuot kotibi.