Shunday deputatlar bor boʻlsin!: Viloyat kengashiga minnatdorchilik xati keldi

Oʻzbekiston “Adolat” SDP Qashqadaryo viloyat Kengashi va uning tuzilmasidagi tashkilotlar tomonidan Oliy Majlis Qonunchilik palatasi va mahalliy Kengashlarga koʻrsatilgan deputatlar olib borayotgan amaliy ishlardan aholi mamnun boʻlayotir. 

Buni kuni kecha Muborak tumanidagi “Sariq” qishlogʻida joylashgan 14-DMTT tarbiyachilari va ota-onalar nomidan yoʻllangan murojaatdan ham bilish mumkin. Unda aytilishicha, qishloqda joylashgan 14-sonli DMTT 2019-yil “Obod qishloq” dasturiga tushib, taʼmirlash ishlari boshlangan edi. Ammo mablagʻ toʻliq shakllanmagani uchun taʼmir tugallanmay qolgan edi. Natijada toʻrt yil davomida 14-sonli DMTT eʼtibordan chetda qolib keldi. Fuqarolarning murojaatiga asosan oʻz hududlaridan saylangan Oliy Majlis qonunchilik palatasi deputati Maxfurat Xushvaqtovaning saʼy-harakati va beminnat yordami bilan 2022-yil boshida mazkur pul mablagʻi shakllantirilib berildi. Hozirgi kunda tashkilot ish faoliyatini boshlab, unda 12 ta xodim ish oʻrniga ega boʻldi hamda mazkur bogʻchada 60 nafar bolajonlarni oʻz bagʻriga oldi.

“Hurmatli Oliy Majlis Qonunchilik palatasi deputati Maxfurat Xushvaqtovaning bizga bergan beminnat yordami uchun 14-sonli DMTT ishchi xodimlari, tarbiyalanuvchilari va bir guruh ota-onalar nomidan oʻz minnatdorchiligimizni bildiramiz.Sizga mustahkam sogʻlik, oilaviy baxt va hududimizdagi muammolarni yechishda berayotgan yordamlaringizga ulkan zafarlar tilaymiz”, — deyiladi murojaatchilar tomonidan yoʻllangan xatda.

Nima ham derdik, yurtimizda fuqarolar tashvishi, dardi bilan yashayotgan Maxfurat Xushvaqtovaga oʻxshagan xalqparvar deputatlar koʻpayaversin. Bilsangiz elning koriga yarash ham oliy baxt.

Oʻzbekiston “Adolat” SDP

Qashqadaryo viloyati kengashi Matbuot xizmati