Sifatli taʼlim-tarbiya bosh maqsadimiz

Davlatimiz rahbari tomonidan 2022-2026 yillarga moʻljallangan Yangi Oʻzbekistonning taraqqiyot strategiyasining “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida”gi Farmonni imzolanishi mamalakatimizning yanada rivojlanishi yoʻlida amalga oshirilayotgan islohotlarning uzviy davomi boʻldi. Amalga oshirilayotgan yangilanishlar davrida taʼlim tizimiga ham alohida eʼtibor berilmoqda.

Albatta, jamiyatning barcha sohalarida faoliyat koʻrsatayotgan yosh kadrlar taʼlim jarayonida berilayotgan bilim, koʻnikma va malakaga tayangan holda ish koʻradilar. Shunday ekan kadrlar salohiyatiga bevosita daxldor boʻlgan oʻqituvchilar oʻz ustilarida koʻproq ishlashlari, dars jarayonida zamonaviy axborot kommunikatsiya vositalaridan hamda turli hil kompetensiyalardan unumli foydalanishlari zarur.

Shu bilan birgalikda, taʼlim muassasalarida iqtidorli oʻquvchilar oʻrtasida sogʻlom raqobat muhitini shakllantirish, oʻzaro doʻstona munosabatlarni mustahkamlash, intellektual qobiliyatlarini rivojlantirish, ularning fanlar boʻyicha bilim va malakalarini almashishlariga hamda fanlardan olgan bilimlarini namoyon etishlariga imkoniyat yaratish diqqat markazimizga aylanmogʻi lozim.

Qolaversa, Yurtboshimiz tomonidan taʼlim jarayonini mazmunan isloh qilish maqsadida taʼlim tizimini yangi shakl va koʻrinishlarini joriy etish, oʻquvchi faoliyatini rivojlantirishga, bolaning shaxsiy fikrini kamol toptirishga xizmat qiladigan, ijodkorlikka yoʻnaltiruvchi natijali taʼlimni tashkil etishga qaratilgan faoliyatni amalga oshirishga erishish muhim vazifa ekanligi koʻp bora taʼkidlanmoqda.

Xususan, Farmonda ham taʼlim sifatini oshirish, sohani ilgʻor xorijiy tajriba asosida isloh qilish maqsadida 2023 yil 1 sentyabrdan boshlab har bir tuman (shahar)ning bittadan umumiy oʻrta taʼlim muassasasida oʻquvchilarni ikkita xorijiy til va bitta kasb-hunarga oʻrgatish amaliyoti bosqichma-bosqich yoʻlga qoʻyilishi, umumiy oʻrta taʼlim muassasalarining 1-4-sinflarida oʻquvchilarni ilgʻor xorijiy tajriba asosida ishlab chiqilgan darsliklar boʻyicha oʻqitish, 5-9-sinflarda oʻquvchilarga umumtaʼlim fanlaridan tayanch bilimlar berish, 10-11-sinf oʻquvchilarining qiziqish va qobiliyatiga mos boʻlgan ixtisoslashgan dasturlar asosida bilim berish amaliyotini joriy qilish kabi masalalar alohida oʻrin egallagan.

Xulosa qilib aytganda taʼlim tizimida amalga oshirilayotgan barcha saʼy-harakatlar, bir maqsadga – farzandlarimizning har tomonlama mukammal taʼlim-tarbiya olishlariga qaratilgan. Zero, taʼlimga eʼtibor- kelajakka eʼtibordir.

Shaxnoza Soatova,

“Adolat” SDP Jizzax viloyat Kengashi

bosh mutaxassisi.