Sifatli taʼlimga “adolatchilar” ham masʼul

Davlatmiz rahbari Oliy Majlis va Oʻzbekiston xalqiga Murojaatnomasida amaldagi yilga “Insonga eʼtibor va sifatli taʼlim yili” deya nom berish taklifini bildirish barobarida bu borada oldinda turgan vazifalarni koʻrsatib oʻtdilar. Va “Taʼlim sifatini oshirish — Yangi Oʻzbekiston taraqqiyotining yakka-yu yagona toʻgʻri yoʻlidir”, — deya alohida taʼkidladilar.

Albatta, sifatli taʼlimga oʻz-oʻzidan erishilmaydi. Bu soha xodimlari zimmasiga yanada katta masʼuliyat yuklaydi. Qolaversa, Prezidentimiz aytganlaridek, sohada boshlagan islohotlarni davom ettirishimiz, taʼlim dargohlariga borib, oʻqituvchi va murabbiylar bilan koʻproq muloqot qilib, oʻquv-tarbiya ishlari sifatini oshirish boʻyicha ular qoʻygan masalalarni birgalikda hal etishimiz kerak.

“Adolat” SDP Qoʻrgʻontepa tuman kengashi tomonidan tumandagi 21-maktabda oʻtkazilgan siyosiy oʻqishda yuqoridagilarga eʼtibor qaratildi. Murojaatnomada koʻrsatib oʻtilgan vazifalarni bajarishga har bir oʻqituvchi masʼul ekanligi, yoshlarga bilim berishda bugungi kun talablaridan kelib chiqib, ish olib borish lozimligi bildirildi. Buning uchun bugungi oʻqituvchi oʻz ustida ishlashi, amalga oshirilayotgan islohotlardan xabardor boʻlib borishi maqsadga muvofiqdir.

Tadbirda siyosiy partiyalar, xususan “Adolat” SDP faoliyati haqida ham soʻz bordi. Oʻz safida koʻplab ziyolilarni birlashtirgan “Adolat”ning maqsad va gʻoyalarini ishtirokchilar qoʻllab-quvvatladi.

Shu kuni mazkur maktab direktori Shohidaxon Usonova va 5 nafar oʻqituvchilar partiya safiga qabul qilindi.

Fotima Siddiqova,
“Adolat” SDP Qoʻrgʻontepa tuman kengashi raisi.