Sifatsiz dori vositalariga qarshimiz

Inson salomatligi hamma vaqt dolzarb masala. Shu sabab soha xodimlarining masʼuliyatini oshirish, tizimda tartib oʻrnatishga alohida eʼtibor qaratilmoqda. Bu borada dorixonalarda sifatsiz va qalbaki dori vositalari savdosiga yoʻl qoʻymaslik maqsadida Oʻzbekiston “Adolat” SDP tomonidan jamoatchilik nazorati olib borilayotgani bejiz emas.

Partiyaning Andijon tuman kengashi aʼzolaridan iborat ishchi guruhi aʼzolari   “Muammo bilan yuzma yuz” loyihasi doirasida joylarda oʻrganish ishlarini olib borishni ayni shu maqsadga qaratdilar. Partiya faollari va safimizdagi tibbiyot xodimlari birinchi navbatda jamoatchilik orasida dori vositalaridan toʻgʻri foydalanish, sifatsiz dorilarning inson salomatligiga salbiy taʼsir koʻrsatishi yuzasidan tushuncha berdilar. Dori vositalaridan shifokor koʻrsatmasi asosida foydalanish lozimligi qayd etildi.

Oʻz oʻrnida “adolatchilar” dorixonalarda ham boʻldilar. Jumladan, tumandagi “Ay bolit” dorixonasi faoliyati tahlil qilindi. 4 nafar soha xodimi faoliyat olib borayotgan mazkur muassasada tartibli ish tashkil etilgan. Fuqarolarga shifokor retsepti asosida dori beriladi. Qalbaki, muddati oʻtgan dori vositalari kuzatilmadi.  

Sogʻlom yashashni istasangiz siz ham shifokor maslahatiga amal qiling. Sifatsiz dorilarni aslo xarid qilmang.

“Adolat” SDP Andijon viloyat kengashi

Matbuot xizmati.