Siyosiy jarayonda adolatchilar faol va tashabbuskor

Oʻzbekiston “Adolat” SDP Qashqadaryo viloyat Kengashi faollari tomonidan Qarshi shahridagi viloyat tarixi va madaniyati davlat muzeyi hovlisida imzo toʻplash jarayoni va varaqalarni toʻgʻri toʻldirilishi borasida yoshlar va xotin qizlar vakillari bilan uchrashuv boʻlib oʻtdi. Unda partiya faollari, ommaviy axborot vositalari vakillari hamda keng jamoatchilik hozir boʻldi.

Oʻtkazilgan targʻibot tadbirida partiya viloyat Kengashi faoli Dilrabo Choriyeva maʼruza qildi. Notiq, eng avvalo “Adolat” sotsial-demokratik partiyasi Saylovoldi dasturida ilgari surilgan siyosiy yoʻnalishlar xususida toʻxtalarkan, siyosiy kuch aʼzolari barcha jarayonlarda faol va tashabbuskor ekanliklarini alohida taʼkidladi. Shu kecha kunduzda partiya aʼzolari tomonidan imzo toʻplash jarayonini har tomonlama namunali oʻtkazish, varaqalar toʻgʻri toʻldirilishi ustidan yetarli nazorat oʻrnatishga jiddiy eʼtibor qaratilayotgani maʼlum qilindi.

-Shu bilan birga muddatidan ilgari boʻlib oʻtadigan Oʻzbekiston Respublikasi Prezidentlikka nomzodning Saylovoldi dasturidan oʻrin olgan rejalarni xalqimizning barcha qatlamlariga sodda va ravon tilda yetkazishimiz lozim,-dedi partiya viloyat Kengashi raisi Ruiddin Raupov.-Men aniq ishonamanki, Prezident saylovi xalqimizning hamkorligi, hamjihatligi va birdamligi ostida oʻtadi. Buning uchun barcha chora tadbirlarni koʻramiz.

Tadbirda boʻlajak saylovda siyosiy kuch munosib nomzod bilan ishtirok etishi, imzo toʻplash jarayoni muvaffaqiyatli oʻtkazilishi alohida qayd etildi. Shuningdek, “Adolat” SDP faollari   huquqiy demokratik davlat va adolatli jamiyat qurish uchun yangi Konstitutsiyaviy normalarni izchil hayotga tatbiq etishda alohida jonbozlik koʻrsatishlari zarurligi taʼkidlandi.

                                  Abdulaziz Abdiyev,

                                  Partiya faoli.