Sizdan boshlanadi asli tafakkur!

Yurtimizda erishilayotgan har bir muvaffaqiyatimiz, ilm-maʼrifat, sport, iqtisod, qishloq xoʻjaligi, qoʻyingki, barcha-barcha sohalarning rivojlanishi oʻqituvchi va murabbiylarning tajribasi, fidoyiligi bilan bogʻliq desak, mubolagʻa boʻlmaydi.

Aytish joizki, “Adolat” SDPning dasturiy-maqsadlarida ham jamiyat rivoji, mamlakat taraqqiyotini taʼminlashda muhim ahamiyatga ega soha vakillarini doimo, har jihatdan qoʻllab-quvvatlash, oʻqituvchi-pedagoglarning huquqiy maqomini yanada koʻtarish, ularning ish haqi va ijtimoiy mavqeyini oshirishga qaratilgan tashkiliy-huquqiy chora-tadbirlar, aniq vazifalar, maqsadlar belgilab olingan.

Shu boisdan elektoratining salmoqli qismini oʻqituvchi-pedagog va murabbiylar tashkil etuvchi “Adolat” SDPning koʻp ming sonli aʼzolari uchun 1-oktyabr — “Oʻqituvchi va murabbiylar kuni” eng qadrli ayyomlardan biridir.

Bayram munosabati bilan bugun “Adolat” SDP hamda Toshkent davlat yuridik universiteti hamkorligida “Sizdan boshlanadi asli tafakkur!” shiori ostida tadbir tashkil etildi.

Tadbir bayramona tabrik soʻzlari bilan boshlandi. Xususan, Oʻzbekiston “Adolat” SDP Siyosiy Kengashi raisi Bahrom Abdurahimovich Abduhalimov, Oʻzbekiston Respublikasi Adliya vaziri Akbar Djurabayevich Tashkulov, Toshkent davlat yuridik universiteti rektori v.v.b Islombek Rustambekovich Rustambekov hamda Toshkent davlat yuridik universiteti faxriylar kengashi raisi Babayev Halim Babayevichlarning oʻqituvchi va murabbiylariga bayram tabriklari oʻqib eshittirdi.

Shundan soʻng, tadbir qatnashchilariga bayram munosabati bilan tayyorlangan videorolik hamda Toshkent davlat yuridik universiteti talabalari ishtirokida badiiy tabrik dasturi namoyish etildi.

Tadbir yakunida turli sohalarda kelajak avlodga taʼlim va bilim ulashishdek ezgu amallari bilan namunali faoliyat olib borayotgan sharafli kasb vakillari — ustoz va murabbiylarning bir guruhiga partiya va boshqa hamkor tashkilotlarning esdalik sovgʻalari topshirildi, kasb bayramlari bilan tabriklab, yaxshi tilaklar bildirildi.

“Adolat” SDP
Matbuot xizmati