Sizning bandligingiz davlat himoyasida

Aholi bandligi hamma vaqt dolzarb vazifalardan biri. Bu borada aniq tizim yaratilganiga qaramay fuqarolar bandligini toʻla taʼminlashga erishilmayotganidan koʻz yumish qiyin. Aslida jamiyatda bir nafar fuqaroning ishsizligi ham katta muammo. Chunki uning ortida oʻzi bilan birga oila aʼzolari ham bor.

Yuqoridagilardan kelib chiqib, Konstitutsiyamizda mazkur masala qonunan mustahkamlanmoqda. Aniqroq qilib aytganda bu vazifani davlat oʻz zimmasiga olyapti. 43-moddada “Davlat fuqarolarning bandligini taʼminlash, ularni ishsizlikdan himoya qilish, shuningdek kambagʻallikni qisqartirish choralarini koʻradi. Davlat fuqarolarning kasbiy tayyorgarligini va qayta tayyorlanishini tashkil etadi hamda ragʻbatlantiradi”, deya belgilab qoʻyildi.

Albatta bu yaxshi. Davlat nafaqat ish bilan taʼminlaydi, himoya qiladi va maʼlum bir kasbga ham yoʻnaltiradi. Hatto 42-moddaga asosan har kim munosib mehnat qilish, kasb va faoliyat turini erkin tanlash, xavfsizlik va gigiyena talablariga javob beradigan qulay mehnat sharoitlarida ishlash, mehnati uchun hech qanday kamsitishlarsiz hamda mehnatga haq toʻlashning belgilangan eng kam miqdoridan kam boʻlmagan tarzda adolatli haq olish, shuningdek ishsizlikdan qonunda belgilangan tartibda himoyalanish huquqiga ega. Qolgani endi fuqaroning oʻz qoʻlida.

Bir soʻz bilan aytganda, sizning bandligingiz Konstitutsiya bilan kafolatlanadi. Shunday ekan unga amal qilish burchimiz.

Madaminjon Madazimov,

“Adolat” SDP Andijon viloyat kengashi raisi.