Sizning mehnatingiz qonun himoyasida

Ayni kunlarda Oliy Majlis Qonunchilik palatasi deputatlari oʻz saylov okruglarida boʻlib, qonunchiligimizdagi oʻzgartishlar va amalga oshirilayotgan islohotlar yuzasidan targʻibot tadbirlarini oʻtkazmoqda. Deputat Oltinoy Mamirova ishtirokida Jalaquduq tumanida tibbiyot xodimlari ishtirokida tashkil etilgan davra suhbati yangi tahrirdagi Mehnat kodeksining mazmun-mohiyati va ahamiyatiga bagʻishlandi.

Deputat mehnat qonunchiligiga kiritilayotgan oʻzgartishlar haqida yigʻilganlarga tushuncha berar ekan, eng dolzarb masalalarga alohida toʻxtaldi. Jumladan, mehnat munosabatlarini tartibga soluvchi yangi qoidalar, ish beruvchi homilador ayollarga birlamchi tibbiy-sanitariya yordami muassasalarida antenatal (tugʻruqqacha) parvarishlash (perinatal skrining va tashxis, majburiy tibbiy koʻriklar va boshqa majburiy tibbiy muolajalar) uchun oʻrtacha ish haqi saqlangan holda qoʻshimcha boʻsh kunlar berishi shartligi, xodimlar, pensiya yoshiga yetganlar hamda tadbirkorlar uchun imtiyozlar va imkoniyatlar, aholi bandligini oshirishga doir boshqa koʻplab yangi normalar haqida maʼlumot berdi.

Oltinoy Mamirova, Oliy Majlis Qonunchilik palatasi deputati:

-Keyingi yillarda mamlakatimizda Prezidentimiz rahbarligida barcha sohalar qatori mehnat munosabatlari tizimida ham sezilarli oʻzgarishlar boʻldi. Sohada tashkiliy-huquqiy, qonunchilik, norma ijodkorligi hamda xalqaro standartlarni joriy etish boʻyicha keng koʻlamli ishlar olib borilmoqda. Bu oʻz-oʻzidan xodim mehnati doim qonun himoyasida ekanini koʻrsatadi. Yana bir masala, yangi tahrirdagi Mehnat kodeksida ish beruvchi tomonidan ish vaqti rejimining turli xil variantlarini belgilash mexanizmlari, shuningdek ish vaqtini hisobga olishning har xil turlaridan foydalanish (kundalik, haftalik yoki umumlashtirilgan ish vaqti hisobi) nazarda tutilmoqda. Dam olish kunini davlat bayramlari (ishlanmaydigan bayram kunlari) kunlariga toʻgʻri kelgan taqdirda koʻchirish qoidasi kiritilmoqda. Bu jamoatchilik tomonidan qoʻllab-quvvatlanyapti.

Aytish mumkinki, mehnat bozorining rivoji uchun xizmat qiladigan yangi tahrirdagi Mehnat kodeksi mamlakatimizda ijtimoiy soha va iqtisodiyotni rivojlantirish, mehnat qonunchiligini takomillashtirishga xizmat qiladi.

“Adolat” SDP Andijon viloyat kengashi
Matbuot xizmati.