Soʻx tumanida Nomzodning ishonchli vakili bilan uchrashuv boʻlib oʻtdi

Oʻzbekiston Respublikasi Prezidentligiga “Adolat” sotsial- demokratik partiyasidan koʻrsatilgan nomzod Robaxon Mahmudovaning Fargʻona viloyatidagi ishonchli vakilining saylovchilar bilan uchrashuvi davom etmoqda. Navbatdagi ijtimoiy- siyosiy tadbir viloyatimizning olis hududlaridan biri — Soʻx tumanidagi 30-bolalar musiqa va sanʼat maktabida tashkil etildi.

Unda partiya faollari, mahalliy Kengash deputatlari, davlat va jamoat tashkiloti vakillari, faxriylar, yoshlar hamda OAV vakillari ishtirok etdilar.

Nomzodning viloyatimizdagi ishonchli vakili Gulbahor Saidgʻanieva Prezidentlikka nomzod Robaxon Maxmudovaning hayoti va faoliyati, Saylovoldi dasturi haqida maʼlumot berdi.

Ishonchli vakil yurtimizda huquqiy davlat qurish, davlat va jamiyat hayotida ijtimoiy adolatni qaror toptirish masalalariga alohida eʼtibor qaratdi.

Ishonchli vakil nutqi davomida Saylovoldi dasturda ilgari surilgan mahalliy davlat hokimiyati organlari faoliyatini tartibga soluvchi qonunchilik hujjatlarini toʻliq xatlovdan oʻtkazish,xalq deputatlari mahalliy Kengashlarining vazirlik va idoralar hududiy boʻlinmalari rahbarlarini ishga qabul qilish va ozod etishdagi, ularni javobgarlikka tortish masalasidagi, hududning kadrlar siyosatiga taʼsir etishdagi vakolatlarini kengaytirish choralarini koʻrish,mahalliy byudjet mablagʻlaridan samarali va oqilona foydalanishni taʼminlash uchun ushbu mablagʻlar hisobidan moliyalashtirilayotgan shtatlar sonini maqbullashtirish boʻyicha ilgari surilgan tashabbuslar borasida gapirib oʻtdi.

Targʻibot tadbirida soʻz olganlar barchani 9-iyul kuni boʻlib oʻtadigan Prezident saylovida faol ishtirok etib, oʻzlari tanlagan munosib nomzodga ovoz berishga chaqirdilar.

“Adolat” SDPdan nomzod Robaxon Maxmudovaning viloyatimizdagi ishonchli vakilining saylovchilar bilan uchrashuvi davom etmoqda.

“Adolat” SDP

Fargʻona viloyati matbuot xizmati.