Sogʻligʻimizni va qoʻrgʻonimizni asraylik!

Ayni kunlardagi mintaqamiz, shuningdek, yurtimizda yoqqan qalin qor va kuzatilayotgan anomal sovuq barchamizning turmushimizga oʻzining taʼsirini koʻrsatmoqda.

Qor bilan qoplangan koʻchalar, taʼlim muassasalari, ishxona va yashash xonadonlarimiz goʻzal boʻlib koʻrinadi. Ammo, atrof-muhitdagi ushbu holat barchamizga maʼlum qiyinchiliklarni yuzaga keltirayotgani bor haqiqat.

Albatta, ushbu vaziyatda obodonlashtirish va tozalov ishlariga masʼul boʻlgan tashkilot xodimlari jonbozlik bilan faoliyat olib borayotganini eʼtirof etish lozim. Lekin, ayni holatga real baho beradigan boʻlsak, qilinadigan ishlar koʻlami hali keng. Uylarimiz, trotuarlarimiz va oʻz ishxonalarimiz hovlilari-yu koʻcha qismlaridagi qor va yaxmalaklarni tozalamasak, ushbu sovuq va namgarchilik bino va inshootlarga, texnika va transport vositalarimizga va eng muhimi oʻzimiz va farzandlarimizning salomatligiga oʻzining salbiy taʼsirini koʻrsatmay qolmaydi.

Shu bois, bugun davlatning, hokimiyatning, masʼullarning yordamiga suyanib qolmasdan, barchamiz shu Vatan farovonligiga daxldorligimizni his qilgan holda, hamjihatlikda oʻzimiz yashayotgan xonadonlarimiz, ishxona, taʼlim va boshqa muassasalarimizning atrofini qordan va muzdan tozalash vaqti keldi.

Ayni vaziyatdan kelib chiqishi mumkin boʻlgan salbiy talafotlarni oldini olish va mavjud keskinlikni yumshatish maqsadida Oʻzbekiston “Adolat” sotsial-demokratik partiyasi faollari barchani 15, 16, 17-yanvar kunlari majburiy emas, balki ixtiyoriy ravishda hashar tashkil etib, uylarimizning trotuarlari, ichki koʻchalarimizni, turli tashkilotlar joylashgan hududlarni atroflari bilan qor va muzdan tozalash ishlarini boshlashga chorlaydi.

Biz oʻzimiz yashaydigan ishlaydigan va uyga-ishga borib keladigan yoʻlaklarimizni qor va muzlamalardan tozalashga koʻmaklashishimiz lozim. Erta-indin taʼtil tamom boʻlib farzandlarimiz maktab-bogʻchaga ketayotganida yiqilib tushsa-yu jarohat olsa yoki oʻzimiz shoshilib ketayotib sirpanib yiqilib tushib yotib qolsak, yana “hokimiyat qayoqqa qaravoti” deymizmi?

Bunday holatlarni oldini olish oʻz qoʻlimizda. Birgalashib trotuarlar va yoʻlaklardagi muz bilan qoplangan joylarni tozalasak yoki qum-tuz aralashmasi bilan sepib qoʻysak, oʻzimiz va yaqinlarimizni ofatdan saqlagan boʻlamiz.

Bizning ishonchimiz komil, partiyamiz tashabbusi bilan amalga oshirilayotgan ushbu ezgu tadbir barcha yurtdoshlarimiz orasida keng ommalashib oʻzining ijobiy samarasini beradi.

Tarixdan maʼlumki, mehnatkash va bunyodkor xalqimiz ogʻir vaziyatlarni birdamlik bilan, ijobiy anʼana tusiga kirgan hasharlar orqali qisqa fursatda yengib oʻtib, dunyo xalqlariga namuna boʻlib kelgan. Boshlagan ushbu xayrli tashabbusimizga qoʻshiladiganlar safi kengayishiga aminmiz.

Oʻzbekiston “Adolat” SDP

Matbuot xizmati