Sogʻlom farzandlar bilan kelajak sari

Kelajak avlod tarbiyasi hamma vaqt dolzarb vazifa. Oʻzbekistonda Yoshlar siyosatiga alohida eʼtibor qaratilayotgani, bu borada qator qonun hujjatlari qabul qilingani bejiz emas. “Adolat” SDPning “Farzandlari sogʻlom yurt – qudratli boʻlur” loyihasi ham kelajagimiz egalarini sogʻlom va barkamol insonlar qilib tarbiyalashga qaratilgan. Mazkur loyiha doirasida amalga oshirilayotgan ishlar jamoatchilik tomonidan qoʻllab-quvvatlanmoqda.

Andijonlik “adolatchilar” tashabbusi bilan Oltinkoʻl tumanidagi 17-maktabgacha taʼlim tashkilotida “Baxtli bolalikka sayohat” shiori ostida tashkil etilgan tadbirda yuqoridagilar oʻz ifodasini topdi. MTT faoliyati bilan tanishish barobarida tarbiyalanuvchilar davrasida boʻlgan “adolatchilar” beixtiyor bolalikka qaytdilar. Farzandlarimizga boʻlgan eʼtibor, yaratilgan sharoitlar ularni quvontirdi. Tarbiyalanuvchilarni oʻzbek tili bilan birga xorijiy tillarni ham oʻrganayotgani eʼtiborli.

Botirjon Muqimov, “Adolat” SDPdan Oltinkoʻl tuman kengashi deputati:

-Yangi Oʻzbekistonni biz bugungi yoshlar bilan quramiz. Shu sabab ularni har tomonlama barkamol insonlar qilib tarbiyalash eʼtiborda. Maktabgacha taʼlim tashkilotlaridagi oʻzgarishlar, kichkintoylar uchun yaratilgan sharoitlarni koʻrib havasingiz keladi. Bugun biz bolajonlar bilan bolalikka qaytdik. Ularning qalbida ona Vatanga muhabbat, sadoqat uygʻonayotgani, sogʻlom insonlar boʻlib kamolga yetish uchun sportga oshno boʻlayotganlaridan koʻnglimiz toʻldi.

Tadbir doirasida tarbiyalanuvchilar oʻrtasida sport musobaqalar tashkil etildi.

“Adolat” SDP Andijon viloyati kengashi

Matbuot xizmati.