Sog’lom hayot uchun  5000 qadam

Yurtimizda soʻnggi paytlarda sogʻlom turmush tarziga alohida eʼtibor berilmoqda. Aholining sogʻlom ovqatlanishi va jismoniy faolligini taʼminlash, yuqumli boʻlmagan kasalliklar profilaktikasi borasida amalga oshirilayotgan ishlar samaradorligini yanada oshirish, har bir fuqaroda sogʻlom ovqatlanish va jismoniy faollik madaniyatini shakllantirish maqsadida yurtimizda, shu jumladan Quvasoy shahrida ham bir qator targʻibot ishlari olib borilmoqda.

Shahardagi sport maktabida Quvasoy shahar hokimligi, tibbiyot birlashmasi, Nuroniy jamgʻarmasi Quvasoy shahar boʻlimi, maktab va maktabgacha taʼlim boʻlimi hamda mahalla xotin-qizlar faollari bilan sogʻlom turmush tarzini targʻib qilish maqsadida “Sogʻlom hayot uchun 5000 qadam” tadbiri oʻtkazildi. Unda shahardagi “Adolat” SDPning yuzlab aʼzolari ham faollik bilan ishtirok etdilar.

Tadbir davomida shifokorlar tomonidan jismoniy faollik hamda sogʻlom ovqatlanish meʼyoriy qoidalariga amal qilmaslik, tarkibida tuz, qand, yogʻ miqdori koʻp boʻlgan taom va shirinliklarni isteʼmol qilish koʻplab kasalliklarni keltirib chiqarishini taʼkidlab oʻtdilar. Shuningdek, yetarli darajada vitamin va minerallar isteʼmol qilmaslik oqibatida yoshlarda ratsional oʻsish va aqliy rivojlanishda ortda qolish, kattalarda esa yurak qontomir, endokrin, xavfli oʻsma kabi kasalliklarni aholi orasida rivojlanishiga sabab boʻlayotganligi haqida batafsil maʼlumotlar berildi.

Ana shundan kelib chiqadiki, har bir insonning salomatligi oʻz qoʻlida. Barcha aytib oʻtilgan qoidalarga amal qilinsa, kasallikni davolash emas, balki uni oldini olgan boʻlamiz. Quvasoy shahar hokimligi, mahalla fuqarolar yigʻinlari bilan hamkorlikda aholi orasida umummilliy harakatlar doirasida turli sport musobaqalari tashkil etilib, gʻoliblar tashkilotchilar tomonidan munosib taqdirlandi.

Tadbir doirasida mahalla bilan birgalikda sogʻlom turmush tarzini targʻib qilishda 40 yoshdan oshgan aholining yuqumli boʻlmagan kasalliklarni erta aniqlash boʻyicha birlashmada skrining tekshiruvlari yoʻlga qoʻyilganligi, har bir fuqaro oʻzining sogʻligʻini bilish uchun bemalol mazkur skrining tekshiruvlardan oʻtishi yuzasidan mutaxassislardan maslahatlar olindi.

                                                               Dilobar  Mirzaeva

                                             “Adolat” SDP Quvasoy shahar Kengashi raisi.