Sogʻlom oila – sogʻlom jamiyat...

Fargʻonada “Sogʻlom oila – sogʻlom jamiyat” tamoyili asosida toʻgʻri ovqatlanish va sogʻlom turmush tarzini shakllantirish, bandlik va ijtimoiy-profilaktikani amalga oshirishda “Mahalladagi beshlik hamkorligi” tizimini yangicha yondashuv asosida yoʻlga qoʻyishda Fargʻona viloyati tajribasini Respublikada ommalashtirish boʻyicha seminar oʻz ishini boshladi.

Seminarda Qoraqalpogʻiston Respublikasi Vazirlar Kengashi Raisi oʻrinbosari, viloyatlar va Toshkent shahar hokimlari oʻrinbosarlari – Oila va xotin-qizlar boshqarmalari boshliqlari, qoʻshni Namangan va Andijon viloyatlarining shahar va tumanlari hokimlari oʻrinbosarlari – Oila va xotin-qizlar boʻlimlari boshliqlari, Sogʻliqni saqlash boshqarmalari boshliqlari, Ichki ishlar vazirligi JXX HPB boshliqlarining xotin-qizlar masalalari boʻyicha oʻrinbosarlari hamda boshqa mutasaddilar ishtirok etmoqdalar.

Viloyat hokimi Xayrullo Bozorov, Bosh vazir oʻrinbosari Zulayho Mahkamova, Ichki ishlar vazirining oʻrinbosari, general-mayor Bekmurod Abdullaev, Sogʻliqni saqlash vaziri oʻrinbosari Elʼmira Basitxanova ishtirokida Margʻilondagi Erkin Vohidov nomidagi istirohat bogʻida boʻlib oʻtgan seminarning dastlabki ochilish tadbirida “Obod va xavfsiz mahalla” tamoyili asosida ijtimoiy profilaktikani tashkil etish mexanizmi boʻyicha Fargʻona tajribasi, “Tarbiyaning bosh maktabi – ota-ona ibrati” loyihasi doirasida amalga oshirilgan ijobiy ishlarga asosiy eʼtibor qaratildi.

Ikki kunlik seminar davomida ishtirokchilar Margʻilon shahrida “Bir hunarmandga oʻn shogird” tamoyili asosidagi Fargʻona tajribasi, Oltiariq tumanida “Sogʻlom oilani shakllantirish”, “Toʻgʻri ovqatlanish va sogʻlom turmush tarzi” umummilliy harakati doirasida amalga oshirilgan ishlar, Rishton tumanida tadbirkor ayol Muhayyo Sattarova faoliyati, Beshariq tumani mahallalarida amalga oshirilgan ishlar taqdimoti bilan tanishadilar, Qoʻqon shahrida xotin-qizlar bandligini taʼminlagan, tajribali va lider tadbirkor ayollarning “Tadbirkor ayol – jamiyat islohotchisi” mavzusidagi biznes forumida ishtirok etadilar.

“Adolat” SDP Fargʻona viloyat Kengashi raisi Shahnoza Gʻanieva ham tadbir davomida joylarda xotin-qizlar bilan yuzma –yuz muloqotlarda ishtirok etar ekan, bir qoʻli bilan beshikni bir qoʻli bilan dunyoni tebratishga qodir ayollarning bugun davlat va jamiyatda tutgan oʻrni va mavqeyi xususida suhbatlashdi. Hazrat Navoiyni, imom Buhoriyni, tibbiyot dahosi Abu Ali ibn Sinoni dunyoga keltirgan va kamolga etkazgan momolar ibrati hamisha onalarimiz uchun azaliy maktab boʻlib qolishi, qadriyatlar avlodlardan avlodlarga meros boʻlib, onalik maqomi hamisha ulugʻlanishi haqida samimiy fikrlarini bildirdi.

“Adolat” SDP

Fargʻona viloyat kengashi Matbuot xizmati.