Sogʻlom turmush tarziga odatlanaylik!

Aholining tibbiy madaniyatini oshirish boʻyicha tibbiyot tizimi soha mutaxassislarining yuqumli boʻlmagan kasalliklarning oldini olish, sogʻlom turmush tarzi koʻnikmalarini shakllantirish, toʻgʻri ovqatlanish tamoyillariga amal qilish boʻyicha xalqimiz orasida targʻibot tadbirlarini olib boryapmiz.

Sogʻlom ovqatlanish yarmarkalari, salomatlik maydonchalari, “Tamakisiz hudud uchun ovoz beramiz!” aksiyalari, “Sogʻlom hayot uchun 5000 ming qadam” jismoniy faollik tadbirlarida yuzlab aholi vakillari faol ishtirok etdilar.

Bundan tashqari yil boshidan buyon aholi orasida sogʻlom turmush tarzini shakllantirish va keng targʻib qilish maqsadida respublikamiz boʻylab, haftaning dushanba kuni – stresslarga qarshi kurashish, seshanba kuni – tuz va shakarni cheklash, chorshanba – tamakisiz kun, payshanba – sogʻlom ovqatlanish, juma – piyoda yurish hamda shanba – salomatlik kunlari sifatida sogʻlomlashtirish tadbirlari oʻtkazilib kelinmoqda.

Oʻzbekiston Respublikasi Prezidentining “Yuqumli boʻlmagan kasalliklar profilaktikasi, sogʻlom turmush tarzini qoʻllab-quvvatlash va aholining jismoniy faolligi darajasini oshirish chora-tadbirlari tadbirlari” toʻgʻrisidagi, “Yurak qontomir kasalliklarining oldini olish va davolash sifatini oshirish chora-tadbirlari toʻgʻrisida”gi kabi qator qaror va farmonlarining ijrosini taʼminlash maqsadida rejali ishlar amalga oshirib kelinmoqda.

Ayniqsa, viloyatimizning mahallalarida barcha aholining sport bilan shugʻullanishlari uchun qulayliklar yaratish maqsadida 1034 ta “Workout” sport maydonchalari hamda tashkilot, muassasa xodimlarini jismoniy faollik bilan shugʻullanishlari uchun alohida sport xonalari tashkil qilindi.

Korxona- tashkilotlarda, taʼlim muassasalarida, mahallalarda tashkil etilayotgan ommaviy sport musobaqalari albatta xalqimizning salomatligini mustahkamlash va turli kasalliklarni oldini olishga qaratilgan. Eng muhimi, xalqimiz sogʻ va omon boʻlsin! Aholisi sogʻlom jamiyat hamisha taraqqiyot sari yuz tutaveradi. Biz sogʻliqni saqlash xodimlari targʻibotlardan aslo charchamaymiz.

Shahnoza Maʼmurova,

ASTTQQ va JFO Fargʻona viloyat,

hududiy boʻlim mudiri, partiya faoli.