Taʼlim huquqiy demokratik davlat poydevori

Dunyoda davlatlar, millatlar koʻp. Ularda umrguzaronlik qilayotgan xalqlarning qarashlari ham turlicha. Albatta, ularning rivojlanishi ham har xil. Masalan, Singapur davlatini olaylik, bor yoʻgʻi 6 milliondan ortiqroq aholi yashayotgan moʻjazgina bu mamlakatda boʻlgan kishi barcha sohadagi taraqqiyotni oʻz koʻzi bilan koʻrib, bunday ulkan muvaffaqiyatlarga qanday erishdi ekan, degan xayolga boradi. Haqiqatdan ham Singapur Prezidentimiz alohida eʼtirof etganlaridek, dunyodagi rivojlangan mamlakatlar sirasiga kiradi.

Singapur Osiyo-Tinch okeani mintaqasining iqtisodiy markazi hisoblanadi. Koʻp yillardan buyon ushbu mamlakat elektronika, kimyo sanoati, biotexnologiyalar, bank sohasi, logistika va transport mashinasozligi kabi muhim tarmoqlardagi muvaffaqiyatlariga tayangan holda jahondagi eng yirik va rivojlangan iqtisodiyotlardan biri boʻlib kelmoqda.

Davlatimiz rahbari Singapur bilan yaqin istiqboldagi hamkorlikning eng asosiy boʻgʻini – inson kapitalini rivojlantirish va davlat boshqaruvi uchun yuqori malakali kadrlar tayyorlashga alohida eʼtibor qaratdi. Li Kuan YU nomidagi Davlat siyosati maktabi ishtirokida boshqaruv, shaharsozlik, infratuzilmani rivojlantirish, raqamli transformatsiya, innovatsiyalar, taʼlim va sogʻliqni saqlash sohalarida birgalikda davlat xizmatchilarini tayyorlash va ularning malakasini oshirish dasturini amalga oshirishga kelishib olindi. Shuningdek, Oʻzbekiston Davlat boshqaruvi akademiyasi negizida Singapurning yetakchi ekspertlarini jalb qilgan holda davlat xizmatchilarini intensiv qayta tayyorlash dasturi ishga tushirilishi belgilab olindi.

Mazkur davlat siyosati maktabi oʻzining islohotlari bilan tanilgan va Singapurning “iqtisodiy moʻjizasi” meʼmori hisoblangan sobiq hukumat rahbari sharafiga nomlangan. Ushbu muassasa davlat siyosati va xalqaro munosabatlar bilan bogʻliq magistrlik dasturlari boʻyicha mutaxassislar tayyorlaydi, shuningdek ilmiy va siyosiy tadqiqotlar olib boradi. Soʻnggi yillarda maktab eng yaxshi universitetlarning jahon reytingida doimiy ravishda birinchi oʻrinni egallab kelmoqda. Xorijiy davlatlarning yuqori lavozimli amaldorlari ham maxsus dastur boʻyicha qisqa muddatli taʼlim olishlari mumkin. Hech kimga sir emaski, Singapurning yirik iqtisodiy va ijtimoiy yutuqlarga erishishi koʻp jihatdan malakali va halol boshqaruv kadrlarini tayyorlashga katta eʼtibor qaratgan. Aynan mana shu masalalar Prezidentimiz faoliyatining boshidanoq ustuvor vazifa boʻlib kelgan. Shu sababli, Singapurning yuqori samarali davlat xizmatchilarini tayyorlash tajribasini oʻrganish va qoʻllash ushbu kontekstda alohida ahamiyatga ega. Prezidentimiz Davlat siyosati maktabi faoliyati bilan batafsil tanishdi va uning rahbariyati bilan boʻlajak ikki tomonlama hamkorlik istiqbollari yuzasidan muzokaralar oʻtkazdi.

Mamlakatimiz istiqboli uchun olib borilayotgan bu kabi oliy darajadagi hamkorliklar albatta oʻz samarasini beradi.

Dilrabo Choriyeva,
partiya faoli