Taʼlim sifati partiya nigohida

Oʻzbekiston Respublikasi Prezidentining “2022–2026-yillarga moʻljallangan yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida”dagi farmoni, Prezident Shavkat Mirziyoyev raisligida maktablarda taʼlim sifatini yanada oshirish, oʻquvchi oʻrnini koʻpaytirish hamda oʻqituvchilar malakasini oshirish va ularga munosib sharoit yaratish masalalari yuzasidan videoselektor yigʻilishida belgilangan ustuvor vazifalardan kelib chiqib Oʻzbekiston “Adolat” SDP Samarqand viloyat Kengashi tashabbusi bilan partiyaning “Taʼlim sifati partiya nigohida” loyihasi doirasida Oqdaryo tumanidagi 32-sonli umumtaʼlim maktabida amaliy seminar tashkil etildi.

Seminarda viloyat maktabgacha va maktab taʼlim boshqarmasi, Demokratik jarayonlarni tahlil qilish markazi viloyat boʻlimi, viloyat bandlik bosh boshqarmasi masʼullari hamda tuman va shaharlarda Oqdaryo tumani tajribasi sifatida kasb-hunarga hamda kasbiy taʼlimga yoʻnaltirilishi koʻzda tutilayotgan umumtaʼlim maktablari masʼullari, oʻqituvchilar, ishlab chiqarish korxonalari mutasaddilari, partiya faollari, mahalliy kengash deputatlari hamda ommaviy axborot vositalari vakillari ishtirok etishdi.

Tadbirning birinchi qismida Oqdaryo tumani tajribasi sifatida viloyatdagi umumtaʼlim maktablarida kasbiy taʼlim va kasb-hunarga oʻqitish faoliyatini yoʻlga qoʻyish borasida amalga oshirilayotgan ishlar, ushbu tizimining amaliyotga keng joriy etilishi yoshlar bandligini taʼminlashdagi, ularning kelajakda oʻz oʻrnini topishlari yoʻlidagi ahamiyati, hududdagi mehnat bozorlarida boʻlgan talab borasida masalalar muhokama etildi.

Tadbirning ikkinchi qismida tajriba almashish maqsadida tuman va shaharlardan tashrif buyurgan maktab direktorlari, malakali oʻqituvchilar hamda deputatlari 32-umumtaʼlim maktabida yaratilgan shart-sharoitlar bilan yaqindan tanishdilar.

Tadbirkorlar hamda mutasaddi tashkilotlar koʻmagida yoʻlga qoʻyilgan ushbu kasb-hunarga oʻqitish tizimining afzalliklarini, yoshlarning oltinga teng har bir soniyasidan unumli foydalanib mehr bilan yogʻoch oʻymakorligi, kulolchilik, milliy kashtachilik va koʻplab zamonaviy kasblar yoʻnalishida kasb sir-asrorlarini oʻrganayotgani, eng asosiysi ushbu kasbiy mahoratini oshirish bilan birga daromad ham olayotgani ishtirokchilarda juda katta taassurot uygʻotdi. Biz ham oʻz maktabimizda ana shunday sharoitlarni yaratish uchun mutasaddilar bilan birgalikda bor imkoniyatimizni ishga solamiz degan fikr-mulohazalaridan amin boʻldikki tashkil etilgan seminar oʻz natijasini beradi, beiz ketmaydi.

Tadbir soʻngida yaqinlashib kelayotgan 1-oktyabr Ustoz va murabbiylar kuni munosabati bilan partiyaning esdalik sovgʻalari maktab maʼmuriyati va oʻqituvchilariga topshirilgan boʻlsa, “Adolat” SDP Samarqand viloyat Kengashining oʻz anʼanasiga xos ravishda bu galgi tadbirda ham maktab kutubxonasiga 100 ga yaqin badiiy asarlar taqdim etildi.

Asqar Xoliqov,

“Adolat” SDP Samarqand viloyat Kengashi raisi oʻrinbosari.