Taʼlim sifati, pedagog masʼuliyati

Oʻzbekiston “Adolat” SDP Qashqadaryo viloyat va Koʻkdala tuman Kengashlari tomonidan partiyaning “Taʼlim sifati – partiya eʼtiborida” loyihasi doirasida “Taʼlim olishda yoshlarga yaratilgan imkoniyatlar: yutuqlar va muammolar” mavzusida davra suhbati tashkil etildi. Tuman xalq taʼlim boʻlimida boʻlib oʻtgan tadbirda deputatlar, partiya faollari, pedagoglar, yoshlar qatnashdi.

-Prezidentimiz vodiy viloyatlariga tashriflari chogʻida yoshlarning sifatli taʼlim olishi, maktabda kasb-hunar egasi boʻlib voyaga yetishiga alohida urgʻu berib oʻtdilar. Shuning uchun ham mamlakatimizda yoshlarga qaratilayotgan eʼtibor va yaratilayotgan imkoniyatlar ular erishayotgan yutuq va marralarda namoyon boʻlmoqda, — dedi xalq deputatlari tuman Kengashi deputati Venera Xusainova. — Yoshlarni har jihatdan qoʻllab-quvvatlash, bandligini taʼminlash, besh tashabbus doirasida boʻsh vaqtini har tomonlama mazmunli tashkil etish uchun barcha imkoniyat va sharoitlar yaratilmoqda. Ayni paytda tumanimizda yashayotgan barcha aholining qariyb 60 foizini 30 yoshgacha boʻlgan yoshlar tashkil etadi. Ularning muammolarini maqsadli oʻrganish va aniq hal etish boʻyicha muayyan saʼy-harakatlar amalga oshirilyapti.

2022-2023 yilning oʻtgan davri davomida 111 nafar yoshlar qurilish sohasiga, 132 nafar yoshlar esa tadbirkorlik yoʻnalishiga, 200 nafar yoshlar qishloq xoʻjaligi yoʻnalishiga, 300 nafar yoshlar jamoatchilik ishlariga va 180 nafar yoshlar boshqa soha va yoʻnalishlarga ishga joylashtirildi.

- Yoshlarimiz fan, taʼlim, musiqa, sport yoʻnalishlarida yurtimiz bayrogʻini baland koʻtarib, katta yutuq va natijalarni qoʻlga kiritmoqdalar, -dedi Oʻzbekiston Qahramoni, xalq deputatlari Qashqadaryo viloyat Kengashi deputati Muhabbat Sharopova. -Siz ham oʻz ustingizda qunt bilan tinimsiz ishlang. Koʻp oʻqing, axborot-texnologiyalari yutuqlarini oʻzlashtiring, musiqa hamda sport bilan shugʻullaning! Zero, maʼnaviyati yuksak, oʻziga ishongan, iqtidorli va oʻz maqsadiga ega yoshlardan hech qachon yomonlik chiqmaydi. Bilimi past yoshlar esa ongsiz ravishda jinoyat koʻchasiga kiradi.

Tadbirda yoshlar taʼlim-tarbiyasidagi boʻshliq oʻz-oʻzidan paydo boʻlib qolmasligi eʼtirof etildi. Shuningdek, oilada, mahallada, taʼlim muassasasida tarbiyadagi oqsoqliklar, maʼnaviyatdagi boʻshliqlar yoshlarning turli qingʻir yoʻllarga kirib ketishiga sabab boʻladi. Shuning uchun ham bu boʻshliqlarni toʻldirishda pedagoglarning oʻrni katta. Oʻqituvchi va murabbiylar ayni paytda oʻz ustida uzluksiz ishlab,  oʻzini namoyon qilish vaqti keldi. Zero, buning uchun yurtimizdagi barcha taʼlim muassasalarida yetarli sharoitlar yaratilgan.

Tadbir tashkilotchilari barcha ishtirokchilarni Yurtboshimiz tomonidan amalga oshirilayotgan islohotlarga birgalikda hissa qoʻshishga chaqirdilar. Barcha yoshlarning kuchlarini birlashtirib, kelajakda yurtimiz gullab yashnashi, tinchligimizning abadiy boʻlishini taʼminlash muhim ekanligi qayd etildi.

- Oʻqib, izlanib, yuqori malakaga ega boʻlib, dunyo yoshlari bilan qadamba-qadam yurishingiz bizning ertangi kunimizni hal qiluvchi muhim omil ekanini unutmang, -dedi tadbir nihoyasida “Yosh adolatchilar” qanoti faoli Husniddin Berdimurodov. — Keling aziz yoshlar, yaratilayotgan imkoniyatlardan unumli foydalanib, yaxshi bilim olib, biz avvalo, oʻzimiz uchun, yaqinlarimiz, oilamiz, va ayniqsa, Vatanimiz ravnaqi uchun kurashaylik.

Sarvinoz Karimova,
“Adolat” SDP Qashqadaryo viloyat Kengashi faoli.