Taʼlim sifatini oshirish — yagona toʻgʻri yoʻl

Bugungi kunda yurtimizda yashayotgan har bir insonning tinch va baxtli hayot kechirishi, uning sogʻligʻi joyida boʻlishi, yaxshi taʼlim olishi uchun hamma shart-sharoitlar yaratib berilyapti. Prezidentimizning Oliy Majlisga va Oʻzbekiston xalqiga Murojaatnomasida mamlakatimiz milliy rivojlanishning yangi davriga dadil qadam qoʻyayotgani, davlat va jamiyat hayotining barcha jabhalarida ulkan oʻzgarishlar yuz berayotganini taʼkidladi. Oʻzbekiston deb atalmish katta va inoq oilaning har bir aʼzosi tinch va farovon hayot kechirishi uchun zarur shart-sharoitlar yaratish yoʻlida tinimsiz mehnat qilinyapti.

Darhaqiqat, biz Yangi Oʻzbekistonni “ijtimoiy davlat” tamoyili asosida qurishni maqsad qilyapmiz. Buni Konstitutsiyada mustahkamlashimiz kerak. Birinchi navbatda, eʼtibor Yangi Oʻzbekiston uchun eng katta investitsiya boʻlgan taʼlimni qoʻllab-quvvatlashga qaratilishi taʼkidlandi. Taʼlimga va sportga sarflangan investitsiya, albatta, oʻz samarasini berishi yana bir karra hayotiy isbotini topdi. Mamlakat kelajagi, barcha sohalar va loyihalar muvaffaqiyati bilimli insonlarga bogʻliq. Shu bois keyingi yillarda taʼlim sifatini yaxshilash, oʻqituvchilar mavqeyini yuksaltirish boʻyicha koʻp ishlar qilindi. Endi mamlakat yangi davrga qadam qoʻymoqda. Oʻzbekistonning 2022-2026-yillarga moʻljallangan taraqqiyot strategiyasida toʻrtinchi ustuvor yoʻnalish aynan taʼlim sohasini, inson kapitalini rivojlantirishga qaratilgan. Davlat rahbari bu hayot-mamot masalasi ekanini taʼkidladi. Oʻqituvchilarning maqomini, ularning shaʼni va qadr-qimmatini himoya qilishni Konstitutsiyada alohida belgilash zarurligi Murojaatnomada ham qayd etildi. Kelgusi yildan boshlangʻich sinflarda mutlaqo yangi metodika asosida yaratilgan darsliklar boʻyicha oʻqitish yoʻlga qoʻyiladi. Jamiyatimizda ilmga intilish sezilarli darajada kuchaydi. Farzandini yaxshi oʻqitaman degan ota-onalar, oʻqishga qiziqqan yoshlar soni koʻpaydi.

Oʻtgan yil boshida Qoraqalpogʻiston va Xorazmda 285 ming nafar boshlangʻich sinf oʻquvchilari uchun bepul ovqatlanish yoʻlga qoʻyildi. Bu borada yetarli tajriba orttirildi. Endi, kelgusi yildan ushbu amaliyot qolgan viloyatlar va Toshkent shahri maktablarida ham joriy etiladi va buning uchun 2,3 trillion soʻm ajratiladi.

Davlatimiz rahbarining taʼlim tizimiga, kelajagimiz egalari – farzandlarimizning puxta taʼlim-tarbiya olishiga doimiy eʼtibor qaratayotgani alohida eʼtirofga sazovor. Chunki, taʼlim bu – taraqqiyot, taʼlim bu – najotdir. Rivojlanishimiz, dunyo davlatlari orasida tutgan oʻrnimiz va obroʻyimizni aynan taʼlim, ilm-fan belgilab beradi. Oʻzbekiston “Adolat” SDPning saylovoldi dasturida ham umumtaʼlim maktablarining boshlangʻich sinflarida uzaytirilgan kun guruhlarini joriy qilish va oʻquvchilarni sogʻlom ovqatlantirishni tizimli yoʻlga qoʻyish ilgari surilgan ,shuningdek saylovoldi dasturimizda taʼlimga investitsiya kiritish — bu kelajakka sarmoya kiritish, xalq farovonligi, davlatning raqobatdoshligini taʼminlash, sifatli taʼlim berish yuqori malakali kadrlarni tayyorlashning muhim omili ekanligi alohida belgilab qoʻyilgan.

Xulosa qilib aytadigan boʻlsak, maktab oʻqituvchi-muallimlari davlat, xalq va kelajak oldidagi masʼuliyatni chuqur his qilib, maktabni faqatgina taʼlim beradigan maskan emas, barchamiz uchun yuksak maʼnaviyat beshigiga, farzandlarimizni bolalikdan boshlab erkin fikrlashga va kasbga oʻrgatuvchi dargohga aylantirishimiz lozim, buning uchun sidqidildan ishlab, natija koʻrsatishimiz kerak. Aziz muallim va murabbiylar, Davlatimiz rahbari biz ustozlarga bildirayotgan yuksak ishonchini albatta uddalaymiz. Bunday masʼuliyatli vazifani bajarishda barchangizga kuch-quvvat tilayman!

Dilafruz Toʻychiyeva,

“Yosh adolatchilar” qanoti aʼzosi,

Qarshi shaharidagi 23-sonli umumtaʼlim maktabi oʻqituvchisi