Taʼlimda sustkashlikka yoʻl qoʻymaymiz

Oʻzbekiston “Adolat” SDP Qashqadaryo viloyat Kengashi tomonidan Qarshi shahridagi yuridik texnikumi tadbirgohida maktablarda taʼlim sifatini oshirish hamda jamiyatda oʻqituvchi kasbining nufuzini yuksaltirish, milliy oʻzligimiz timsoli, maʼnaviyatimiz asosi boʻlgan ona tilimizga eʼtiborni yanada kuchaytirish masalalariga bagʻishlangan tadbir boʻlib oʻtdi. 

Unda partiya faollari, pedagoglar, huquqshunoslar, yoshlar ishtirok etdi. Tadbirda Davlatimiz rahbarining Oliy Majlis va Xalqimizga yoʻllagan Murojaatnomasi keng tushuntirildi.

Dunyo miqyosida olib qaraydigan boʻlsak, koʻplab rivojlangan davlatlar eng birinchi navbatda taʼlimga katta eʼtibor qaratishgan,- deydi “Adolat” SDP viloyat Kengashi raisi Ruiddin Raupov. — Murojaatnomada ham Davlatimiz rahbari najot taʼlimda , maktabda ekanligini bot-bot uqtirdilar. Maktablarda taʼlim sifati hamda jamiyatda oʻqituvchi kasbining nufuzini oshirish, ularning sharoitlarini, imkoniyatlarini yaxshilash, joriy yildagi eng asosiy vazifalarimizdan biri boʻlib qoladi. Shuningdek, ikki smenalik taʼlimni yoʻqotib bir smenali taʼlimga oʻtilishi, milliy oʻzligimiz timsoli, maʼnaviyatimiz asosi boʻlgan ona tilimizga eʼtibor yanada kuchaytiriladi. Yoshlarni chet tillarni yaxshi oʻzlashtirishlari uchun barcha zarur chora-tadbirlar koʻriladi. Albatta, chet tilini bilish — zamon talabi, ammo ona tilini bilish muhim masala, oʻqituvchilarning maqomini, ularning shaʼni va qadr-qimmatini himoya qilishni taʼminlashimiz kerak.

Murojaatnomada taʼlimning boshlangʻich, oʻrta va oʻrta-maxsus tizimida amalga oshirilishi zarur boʻlgan ishlar xususida ham batafsil soʻz yuritilgan, — deydi xalq deputatlari Qarshi shahar Kengashi deputati Qahramon Roʻziboyev. — Xususan, amaldagi yildan boshlab boshlangʻich sinflarda mutlaqo yangi metodika asosida yaratilgan darsliklar boʻyicha oʻqitish yoʻlga qoʻyilishi koʻzda tutilgan. Viloyatlar maktablarida oʻquvchilarni bepul nonushta bilan taʼminlanishi joriy etilgani taʼlim tizimi xodimlari, keng jamoatchilik va ota-onalar tomonidan yaxshi kutib olindi.

Aytish joizki, partiyamiz saylovoldi dasturida ham taʼlimni har tomonlama rivojlantirish ustuvor vazifa etib belgilangan. Shu bois ham mamlakatimizni ijtimoiy-iqtisodiy rivojlantirish, xalqimiz turmush farovonligini yanada oshirish Davlatimiz rahbari Murojaatnomasida belgilab berilgan maqsad-vazifalar ijrosini bosqichma-bosqich tarzda bajarilishiga koʻp jihatdan bogʻliq.

Tadbirda partiya faollari va mutaxassislar taʼlim yoʻnalishi xususida toʻplanganlarga kerakli yoʻl-yoʻriqlar berdilar.

Akmal Hayitov,
“Adolat” SDP Qarshi shahar
Kengashi raisi.