Taʼminotdagi uzilishlar deputat eʼtiborida

Gʻuzor tumanidagi 51 ta mahalla va 78 ta qishloqda 210 ming nafar aholi istiqomat qiladi. Tuman aholisini toza ichimlik suvi bilan taʼminlash uchun 62 kilometrlik Yakkabogʻ- Gʻuzor magistral suv quvurlari qayta taʼmirlanib, 6 kilometrdagi qismi almashtirildi. Ikkita suv taqsimlash inshooti barpo etildi. Suv saqlash va tarqatish inshootidan tuman markaziga 41 kilometrlik magistral quvuri tortib borildi. Buning evaziga Amir Temur, Batosh, Tinchlik, Obod, Buyuk Karvon, Doʻstlik, Navroʻz MFYlarida umrguzaronlik qilayotgan 8 ming nafar aholi ichimlik suvi bilan taʼminlandi. Oliy Majlis Qonunchilik palatasi deputati Dilshod Hamzayev ana shu suv saqlash va tarqatish inshootlari orqali xonadonlarga yetib borayotgan obi hayot taʼminoti bilan tanishdi. Uyma-uy yurib aholi bilan muloqot uyushtirganda fuqarolar toza ichimlik suvi oʻz vaqtida kelib turganligidan mamnun ekanliklarini bildirishdi.

Shuningdek deputat tumandagi Amir Temur mahallasida amalga oshirilayotgan koʻkalamzorlashtirish va obodonlashtirish ishlarini koʻzdan kechirdi. “Orif Xolmirzo Hoji” fermer xoʻjaligi dalalarida boʻlib, koʻklamgi ekin-tikin ishlarini namunali tashkil etilayotganligiga amin boʻldi. Taʼminotdagi uzilishlar masalasida dehqonlarga amaliy yordam koʻrsatdi.

Shodmon Eshboyev,
deputat yordamchisi.