Targ'ibot tadbirlari boshlandi

Fargʻona shahridagi Tadbirkorlar uyida Xalq deputatlari viloyat, tuman, shahar Kengashlari deputatlari, siyosiy partiyalar faollari, Nodavlat notijorat tashkilotlar rahbarlari ishtirokida “Oʻzbekiston Respublikasining ayrim qonun hujjatlariga saylov va referendum oʻtkazish tartibini yanada takomillashtirishga qaratilgan oʻzgartirish va qoʻshimchalar kiritish toʻgʻrisida”gi Konstitutsiyaviy qonun loyihasi yuzasidan “Saylov organlari tizimi takomillashtirilishining oʻziga xosligi” mavzusida seminar oʻtkazildi.

Ushbu konstitutsiyaviy qonun loyihasida ikkita muhim masalaga alohida eʼtibor qaratilgan. Birinchidan, Oʻzbekiston Respublikasi Konstitutsiyasining 129-moddasiga muvofiq, Markaziy saylov komissiyasi boshchilik qiladigan markazlashgan saylov komissiyalarining vertikal tizimini tashkil etish, ikkinchidan, mamlakat saylov tizimiga aralash (majoritar, proporsional) saylov shaklini joriy etish va shu orqali Oliy Majlis Qonunchilik palatasi saylovini aralash saylov tizimi asosida oʻtkazishni nazarda tutuvchi yangi va demokratik normalarni mamlakatimiz saylov qonunchiligi va amaliyotiga tatbiq etish nazarda tutilgan.

Seminar davomida ishtirokchilar kelgusida mamlakatimizda barcha darajadagi saylovlar va referendumni Konstitutsiya, saylov va referendumga oid qonunlarga muvofiq tarzda, yuqori saviyada tashkil etish va oʻtkazishda oʻzining ijobiy samarasini berishini taʼkidladilar.

Seminar soʻnggida ishtirokchilar tomonidan berilgan savollarga targʻibot guruhi rahbari, Oʻzbekiston Respublikasi Oliy Majlisi Qonunchilik palatasi deputati Shuhrat Sharafutdinov atroflicha javob berdi.

“Adolat” SDP

Farg’ona viloyat kengashi Matbuot xizmati.