“Til-millat koʻzgusi!”

Prezidentimiz va Hukumatimiz tomonidan Oʻzbek tilining mavqeyi va nufuzini oshirish, uni asrash va yanada boyitishga alohida eʼtibor berilayotgani barchamizni quvontirmoqda.Hammamizga maʼlumki, 2020-yil 10-aprelda qabul qilingan Oʻzbekiston Respublikasining “Oʻzbek tili bayrami kunini belgilash toʻgʻrisida”gi Qonuni bilan 21-oktyabr – Oʻzbek tili bayrami kuni etib belgilandi. Xalqimizning asriy orzu umidlarini oʻzida ifoda etgan bu bayram bugun yurtimizda asl milliy ayyomlardan biri sifatida keng nishonlanmoqda.

Jumladan Boʻstonliq tumanida ham til bayramiga bagʻishlangan turli madaniy-maʼrifiy kechalar, uchrashuv va tadbirlar oʻtkazilmoqda. Bugun tumandagi 2-sonli umumtaʼlim maktabida Oʻzbek tili bayrami kuniga bagʻishlangan bayram tadbiri oʻtkazildi.

Tadbirda “Adolat”Toshkent viloyati SDP Boʻstonliq tumani Kengashi raisi Akrom Saydaliyev ishtirok etib, yigʻilganlarni va barcha yurtdoshlarimizni Oʻzbek tili bayrami kuni bilan tabriklab, millatimiz gʻururi boʻlgan oʻzbek tilimizning nufuzini yanada oshirish, vatanimizni yanada taraqqiy ettirish yoʻlidagi faoliyatida muvaffaqiyatlar tiladi.

Tadbirda maktab oʻquvchilari tomonidan bayramga bagʻishlangan adabiy-musiqiy dastur namoyish etildi. Yosh isteʼdod egalari tomonidan tilimizni ulugʻlovchi sheʼrlar oʻqildi.

Tadbir davomida dunyodagi eng qadimiy va boy tillardan biri boʻlgan oʻzbek tilining tarixi, ona tilimiz ravnaqiga munosib hissa qoʻshgan buyuk allomalar toʻgʻrisida maʼlumotlar berildi. Navoiy, Fuzuliy singari mumtoz adabiyotimiz namoyandalari gʻazallariga bastalangan qoʻshiqlar, jozibali raqslar tadbirga oʻzgacha shukuh baxsh etdi.

“Adolat” SDP Toshkent viloyati Kengashi Matbuot xizmati.