Tinchlik – taraqqiyot garovidir

Biz azal-azaldan tinchliksevar xalqmiz. Eng oliy tilagimiz ham yurt tinchligi. Har yili Xotira va Qadrlash kunini Oʻzbekistonda katta bayramga aylanishi ham bejiz emas. Bu kun yurtdoshlarimiz nafaqat tinchligimiz yoʻlida qurbon boʻlganlarni xotirlaydi, faxriylarga hurmat va ehtirom koʻrsatadi, ularning duolarini oladi. Bu milliy qadriyat, insoniylik. “Adolat” SDP Andijon viloyat kengashi tomonidan ishlab chiqilgan “Sizga taʼzimdamiz, faxriylar!” loyihasi ham ayni shu maqsadga qaratildi. Loyiha doirasida partiyadoshlarimiz Ulugʻnor tumanida boʻldilar. Dastlabki manzil sifatida partiya faoli, bir necha yil partiyaning Ulugʻnor tuman kengashi raisi vazifasida faoliyat yuritgan Moʻminjon Sattorov xonadoni tanlandi. Faxriy otaxon eʼtibordan quvonchini yashira olmadi. Oila aʼzolari va mahalladoshlari uning xursandchiligiga qoʻshildilar.

Moʻminjon Sattorov, partiya faxriysi:

-Toʻgʻri, bayramlarimiz koʻp. Shunday boʻlsa-da bu kun boshqacha. 9-mayda ilgarilari birgina Ikkinchi jahon urushi qatnashchilarini xotirlash va qadrlashga oʻrgangandik. Mustaqillik yillarida uning mazmuni kengaydi, oʻzgacha, milliy xususiyat kasb etdi. Chinakam milliy – umumxalq bayramiga aylandi. Eʼtibor va qadr – insonni yuksaklikka koʻtaradi, hayotga boʻlgan ishonchini oshiradi. Eng asosiysi, yurtimizdagi tinchlik-taraqqiyot garovidir. Uni qadriga yetaylik.

Ulugʻnorlik yana uch faxriyning xonadonida boʻlgan suhbatlarda inson qadri va yurt tinchligi qayta-qayta tilga olindi. Oʻzbekistonimizga koʻz tegmasin, deya duolar qilindi. Aksiya doirasida faxriylarga viloyat partiya kengashining esdalik sovgʻalari topshirildi.

“Adolat” SDP Andijon viloyati kengashi

Matbuot xizmati.