Tinchlik xalqimiz uchun bebaho qadriyat

Yurt taraqqiyoti, xalq farovonligining eng muhim kafolati-bu tinchlikdir. Ammo, biz shu tinchlik va xotirjamlikni qadrlay olyapmizmi? Qoʻshnimizning uyida ayoli va farzandlariga boʻlgan zoʻravonliklarga loaqal munosabat bildira olyapmizmi? Oila tinchligi – jamiyat tinchligi va vatan taraqqiyoti bilan uzviy zanjir ekanligini anglay olyapmizmi?  

Dunyoning turli manzillarida roʻy berib turgan notinchliklar, insonlarning dilini xufton qiladigan holatda gʻaflatda qolishga esa hech birimizning haqqimiz yoʻq. “Oʻzbekiston – inson qadri ulugʻlangan yurt” loyihasi doirasida viloyatdagi nuroniylar, baynalmilalchi jangchilar bilan mahallalarda, korxona, tashkilotlarda, yoshlar davrasida uchrashuvlar tashkil etyapmiz. Qatagʻon qurboniga aylangan vatandoshlarimiz qismati, ikkinchi jahon urushi qatnashchilari va baynalmilal jangchilar hikoyalari orqali yoshlar ong-u shuurida tinchlikni qay qadar bebaho neʼmat ekanligini singdirib boryapmiz.

Mamlakatimizda Prezidentimiz boshchiligida tinchlikni asrab- avaylash, Oʻzbekistonning taraqqiy etgan davlatlar bilan siyosiy –iqtisodiy, madaniy, maʼnaviy –maʼrifiy sohalarda hamkorlikni yoʻlga qoʻyish orqali tinchlikni asrash yoʻlida olib borilayotgan odilona siyosatini muloqotlarda xalqimizga va yoshlarga taʼkidlab oʻtyapmiz.

Viloyat Kengashi deputati sifatida mahallalarga, xonadonlarga kirib borar ekanmiz, ularning quvonch va tashvishlariga baholi qudrat sherik boʻlamiz. Oʻnlab, yuzlab insonlarga oʻz koʻmagimizni berishga harakat qilamiz. Insonning hayotda yashashdan ham maqsadi shu emasmi? Bir-biriga mehr qoʻllarini choʻzib, qalblarga quvonch bagʻishlash. Shu tinch va osuda osmon ostida toʻyib-toʻyib nafas olayotganligimiz, oila bagʻrida farzandlarimiz baxti-kamolini koʻrib, toʻylar qilib, yaxshi kunlarga hamdamligimiz uchun ham shukronalar keltirishimiz joiz. Bu vatan sizu bizniki, avlodlarimizniki ham. Shunday vatanni, tinchlikni, xotirjamlikni asrash barchamizning muqaddas burchimiz.      

                                                              Zokirjon Rahmanov

            Xalq deputatlari Fargʻona viloyat Kengashi deputati, viloyat “Nuroniy” jamgʻarmasi raisi.