Toza tabiat – sof kelajak uchun

Oʻzbek xalq azal-azaldan atrof-muhitni asrab-avaylash, tabiatga ehtiyotkorona munosabatda boʻlish, tozalikka rioya qilish rizq kengligi, barakaliligi, insonlar salomatligining muhim omili sifatida katta eʼtibor qaratilgan. Ushbu yoʻnalishda Oʻzbekiston “Adolat” sotsial demokratik partiyasi ham mamlakatimizda ekologik barqarorlikni taʼminlashni oʻta muhim vazifa, deb hisoblaydi va atrof-muhitni asrab-avaylash, ekologik munosabatlarni tartibga solish borasidagi islohotlar samarali amalga oshirilishiga munosib hissa qoʻshish, hayvonot olami va oʻsimlik dunyosi daxlsizligini taʼminlash, aholi salomatligini himoya qilish bilan bogʻliq masalalarda nodavlat notijorat tashkilotlar bilan birgalikda hamkorlik qilish maqsadida “Toza tabiat – sof kelajak uchun” loyihasi doirasida amaliy ishlarni olib bormoqda.

Ana shunday tadbirlardan biri Samarqand tumanidagi “Xoʻja Ahrori Valiy” mahalla fuqarolari yigʻinida partiyaning “Toza tabiat – sof kelajak uchun” loyihasi doirasida “Mahalla obodligiga har birimiz masʼulmiz” mavzusida tuman Obodonlashtirish xodimlari, tuman ekologiya boʻlimi hamda “Xoʻja Ahrori Valiy” MFYda yashovchi fuqarolar ishtirokida tadbir tashkil etildi.

Tadbirda soʻz olganlar yurtimizni ozoda va pokiza saqlash, hasharlar tashkil qilish orqali mahalla va guzarlarni tozalash, bogʻ-rogʻlar yaratish kabi ota-bobolarimizdan qolgan azaliy qadriyatlar haqida oʻz fikr-mulohazalarini bildirib oʻtdi. Atrof-muhitni ozoda saqlash bizning ustuvor burchlarimizdan ekanligi qayd etildi.

Albatta, bizga ota-bobolarimiz toza, ozoda tabiatni qoldirishgan. Toza osmon, musaffo atmosfera, hatto mahallalar ham. Dalalar toza. Biz-chi? Xush, mahallalarimiz tozami, baʼzi ariqlarimizga bir qarang, nimalar yoʻq bu ariqlarda?! Ariqlarga nimalar tashlashni oʻrganmadik, chiqindi, sellofon, bakalashka, quti, sigareta, pista poʻchoqlari, qogʻoz... Qoʻlga nima ilinsa. Ota-onalarimiz dalalarimizning serhosilligi uchun jonlarini berishar, vatanni bir kaft tuproqda koʻrishar, uni begona koʻzdan himoya qilishardi. Yoʻllarning, qishloqlarning toza, ozodaligi eʼtiborda edi. Hozir-chi? Obodonlashtirish xodimlari zimmasida hammasi. Tabiatni odam bilan teng koʻrishardi. Tarbiya tabiat bilan uzviy bogʻlangandi. Bizning es-u dardimiz telefonda, internet, ijtimoiy tarmogʻi antennalarda. Toʻgʻri, bu ham kerakdir. Lekin meʼyori bilan. Ota-bobolarimiz suv muqaddas, deb tarbiya berishgan. Biz-chi? Ajdodlarimiz vatanni qanchalar asrashgan, avaylashgan, uylarini muqaddas bilishgan. Azizlar, biz ham shunday qilaylik, mahallamizni, koʻchalarimizni, toza saqlaylik, Vatanimiz, ostonamizni ajdodlarday yaxshi koʻraylik. Avlodlarga ham shuni oʻrgataylik, oʻrnak boʻlaylik. Zero, tozalik bor joyda rizq, baraka boʻladi, insonlar salomatligi mustahkamlanadi.

Zuhra Quddusova,

Xalq deputatlari Samarqand tuman Kengashi deputati.