Tozalik bor joyda baraka boʻladi

Bugungi kunda chiqindi muammosi nafaqat Oʻzbekistonni balki butun dunyo ahlini tashvishga solmoqda. Urbanizatsiya jarayoni jadallashib, shaharlar kengayayotgan, aholi soni oʻsayotgan va uning ehtiyojini qondirish uchun millionlab turdagi tovarlar ishlab chiqarilayotgan bir paytda chiqindilarni qayta ishlash va ularning utilizatsiyasi eng katta ekologik muammolardan biridir.

Bu holatga tezda yechim topilmasa hududlarda ekologik va sanitariya-epidemiologik holat yomon boʻlib boraveradi. “Adolat” SDP Sirdaryo viloyat Kengashi deputatiga oʻz saylov okrugi Baxt shahri “Tinchlik” va ”Xazina” MFYlari aholisidan murojaat kelib tushdi.

Shu mahallalar hududida bir nechta chiqindi uyumlari paydo boʻlib, bir oy boʻlibdiki chiqindilarni hech kim olib ketmayapti, havo isishi bilan chiqindilardan havoga badboʻy hid tarqalib, hudud aholisi uchun noqulayliklar keltirib chiqarmoqda.

Bu masalada mutasaddi tashkilotlarning xam oʻz eʼtirozlari bor. Aholidan chiqindini olib ketish uchun toʻlovlar oʻz vaqtida toʻlanmasligi oqibatida debitor qarzdorlik paydo boʻlgan. Chiqindilarni tashish xizmati haqqini oz vaqtida toʻlamaslik xizmat sifatiga salbiy taʼsir qilishi koʻpchilikka nomaʼlum boʻlsa kerak. Mazkur muammo borasida har ikki tomon ham birdek masʼuliyatni his qilishi katta ahamiyatga ega.

Tozalik bor joyda baraka boʻladi, deydilar. Viloyatimiz hududi, koʻchalar va mahalla atrofini ozoda saqlash barchamizning fuqarolik burchimizdir. Biror erni supurib-sidirish qoʻlimizdan kelmasa-da, hech boʻlmasa shu erga chiqindi tashlash, ifloslantirishdan oʻzimizni tiyishimiz ham tozalikni saqlashga qoʻshgan hissamizdir.

“Adolat” SDP Sirdaryo viloyat kengashi Matbuot xizmati.