Tozalik yoʻlida birlashib yurtni obod qilamiz

“Adolat” SDP Qarshi tuman Kengashi va yoshlar ishlari agentligi tomonidan Mirmiron MFY tadbirgohida partiyaning “Tozalik yoʻlida birlashaylik” loyihasi doirasida tadbir boʻlib oʻtdi. Yoshlarda tozalik va gigiyena qoidalariga rioya etish, obodonlashtirish sohasi xizmatchilarining mehnatiga va yaratilgan sharoitlarga hurmat, daxldorlik hissini uygʻotish bugungi kunning dolzarb vazifasi hisoblanadi. mamlakatimiz obodligi yoʻlida koʻngilli ishtirokchilarni keng jalb etish, har bir tashkilot va muassasaning oʻz hududini toza saqlashda mansabdor shaxslarning masʼuliyatini oshirish, sohaga doir qonun hujjatlarini takomillashtirish hamda sanitariya-epidemiologik holatni yaxshilash orqali aholi salomatligini saqlash ham muhim.

Mahalliy Kengash deputatlari, partiya faollari, keng jamoatchilik vakillari ishtirok etgan tadbirda shular xususida fikr yuritildi.

Tadbirda xalq deputatlari Qashqadaryo viloyat Kengashi deputati Qoʻyli Narzullayev Yangi Oʻzbekiston obodligi, xalqimiz farovonligi borasida olib borilayotgan ishlar haqida toʻxtaldi.

- Tozalik   va saranjom-sarishtalik uzoq yillar davomida ajdodlarimiz soʻzsiz amal qilib kelgan yuksak fazilatdir-dedi Qoʻyli Narzullayev.- Albatta qayerdaki obodlik,   tozalik bor ekan, oʻsha yurtda salomatlik, qut-baraka, fayz boʻladi. Negaki, obodlik, tozalik — poklikdan darak.Ibn Sino bobomiz alohida eʼtirof etganidek, tozalikning inson sogʻligʻi uchun ahamiyati beqiyos. Shuning uchun ham xalqimiz saranjom-sarishta va tartibli xonadonda inson qalbi va ruhi pok boʻladi, deb bejizga aytmagan.

- Shu kecha-kunduzda mamlakatimizda ekologiyani asrash va atrof-muhitni toza ozoda saqlash orqali yurtdoshlarimizning har tomonlama qulay muhitda yashashini taʼminlash borasida ulkan ishlar amalga oshirilmoqda,-dedi partiya faoli Nodir Ziyodullayev.- Shunga amal qilgan holda tumanimizning barcha mahallalarida partiyamiz faollari tashabbusi bilan hasharlar tashkil qilinib, mahalla va guzarlardagi ariq va zovurlar tozalanyapti, mevali va manzarali daraxtlarga shakl berilib, ichki yoʻllardagi turli chiqindilar tozalanyapti. Atrof-muhit ifloslanishini oldini olish, ayniqsa, yosh avlodni tabiatni asrashga oʻrgatish borasida bu kabi xayrli ishlarga yoshlar ham keng jalb etilyapti. Umuman olganda, barchamiz tozalik yoʻlida birlashib,hamkor hamjihatlik bilan bir yoqadan bosh chiqarib, yurtni ozoda qilishga oʻz hissamizni qoʻshishimiz darkor.
Tadbirni tashkil etgan masʼullar barcha ishtirokchilarni va keng jamoatchilik vakillarini tozalik yoʻlida birlashib, Yangi Oʻzbekistonimizni obod etishga chaqirdilar.

    Yoqub Amirqulov,

Partiya faoli.