Uch avlod uchrashuvi

Mamlakatimizda tinchlikni mustahkamlash, xalqimiz farovonligini taʼminlash, keksalarni eʼzozlash, ertamiz egalarini barkamol etib voyaga yetkazishga davlat siyosatining ustuvor yoʻnalishi sifatida eʼtibor qaratilmoqda.

Yoshlar ishlari Agentligi Buxoro viloyat Boshqarmasining kichik faollar zalida Oʻzbekiston “Veteran” jangchi-faxriy va nogironlari Birlashmasi Buxoro viloyat boʻlimi bilan hamkorlikda “Uch avlod uchrashuvi” tashkil etildi.

Uchrashuvda Oʻzbekiston “Adolat” SDP Buxoro viloyat Kengashi raisi Maqsud Hamidov va Kengashning rais oʻrinbosari Sanjar Maydonov, Yoshlar ishlari Agentligi Buxoro viloyat Boshqarmasining ishchi xodimlari, Oʻzbekiston “Veteran” jangchi-faxriy va nogironlari Birlashmasi Buxoro viloyat boʻlimining faxriy aʼzolari, talaba yoshlar va OAV jurnalistlari ishtirok etishdi.

Keksalar tajribasi yoshlar uchun hayot maktabi –deydi “Adolat” SDP Buxoro viloyat Kengashi raisi Maqsud Hamidov oʻz nutqida. Ayniqsa, ularning qimmatli pand-nasihatlari, hayot saboqlari yoshlarning shijoati bilan birlashsa, jamiyatni rivojlantiruvchi kuchga aylanadi. Qolaversa, mamlakatimizda amalga oshirilayotgan keng koʻlamli islohotlarning mazmun-mohiyatini yosh avlodga yetkazishda keksa avlod va faxriy harbiylarning alohida oʻrni bor.

Darhaqiqat, mamlakatimizda barcha sohalarda islohotlar jadal suratlarda davom etyapti. Bu yangilanish va oʻzgarishlar avvalo fuqarolarning manfaatlari, ularning hayotdan rozi boʻlib yashashlari uchun xizmat qilyapti. Bunday oʻzgarishlarga shukrona keltirib yashash, imkoniyatlardan oqilona foydalanishda esa “Uch avlod uchrashuv”lari katta rol oʻynamoqda.

Yoshi ulugʻ otaxon va onaxonlarimiz hayoti va mehnat faoliyati davomida toʻplagan boy tajribasi, yoshlik davridagi oʻziga xos qiyinchiliklar, mehnat pallasidagi mashaqqatlar, nihoyat nuroniylik paytida koʻrsatilayotgan hurmat-ehtirom haqida oʻz dil soʻzlarini, samimiy fikrlarini bildirdi. El-yurt ravnaqi yoʻlida mamlakatimiz rahbariga yaqin koʻmakchi, kamarbasta boʻlish lozimligi uch avlodga mansub yurtdoshlarimiz oʻrtasida kechgan samimiy suhbatlar bosh mavzusiga aylandi.

Tadbirda ishtirok etayotgan jangchi faxriylar talaba yoshlarga jonajon Oʻzbekistonimizda hukm surayotgan tinchlik-osoyishtalik, millatlararo totuvlik, bagʻrikenglik muhitini koʻz qorachigʻidek asrab-avaylash, Ona Oʻzbekiston taraqqiyoti yoʻlida bir musht boʻlib, davlatimiz rahbariga tayanch va suyanch boʻlib, yashash, mehnat qilish, kelgusi avlodlarni shu ruhda kamol toptirish muqaddas burch ekanligini taʼkidlashdi.

Uchrashuv yakunida talaba yoshlarga partiyaning esdalik sovgʻalari ulashildi.

Mohigul Rahimqulova,

“Adolat” SDP Buxoro viloyat Kengashi matbuot kotibi.