Ulugʻ ayyomga bag'ishlab

Xotira va qadrlash kuniga bagʻishlangan tadbirlar hamma erda boʻlgani kabi Norin tumanida ham uyushqoqlik bilan oʻtmoqda. Korxona va tashkilotlarda, mahallalarda, oʻquv muassasalarida uchrashuvlar, davra suhbatlari, muloqotlar tashkil etilmoqda. Xalqimizning bugungi farovon hayotini taʼminlashga hissa qoʻshgan ulugʻ insonlar nomi yodga olinmoqda.

- Ayni paytda Norinda bir nafar ikkinchi jahon urushi qatnashchisi istiqomat qiladi, — deydi “Adolat” SDP tuman kengashi raisi Nosirjon Hasanov. – Hokimlik va jamoatchilik vakillari bilan birgalikda faxriy jangchining xonadoniga tashrif buyurdik. Otaxonni muborak ayyom bilan qutlab, sovgʻa salomlar topshirdik. Faxrining olovli yillar haqidagi hikoyasini hamma katta qiziqish bilan tingladi.

Gap “Katta Oʻlmas” mahalla fuqarolar yigʻinida yashovchi Turdiboy ota Mamatov haqida kelmoqda. Yaqinda 96 yoshni qarshilagan faxriy 1943 yilda koʻngilli ravishda frontga otlangan. Rossiyaning Bryansk viloyatida oʻqchi diviziyada jang qilishni boshlagan. Oʻzining jasurligi, mardligi, yigitlik burchiga sodiqligi bilan quroldoshlari hamda qoʻmondonning eʼtirofiga sazovor boʻlgan. Urushdan soʻng esa tumanda qishloq xoʻjaligini rivojlantirishga munosib hissa qoʻshgan.

– Urush azoblarini tortganman, yaqinlarimdan ayrilganman, oʻqchi askar sifatida dushman bilan bir necha bor yuzma-yuz kelganman, – deydi Turdiboy ota Mamatov. – 1944 yilda qattiq yaralangandim, bir necha bor jarrohlik amaliyotini boshdan oʻtkazdim, lekin urush boʻlgan joylarda vayronaga aylangan uy-joylarni tiklashda xizmat qilishni burchim, deb bilganman. Hozirgi kunda biz, nuroniylar doimiy eʼzozda ekanimizdan xursandmiz. Besh nafar farzandim atrofimda doim parvona. Urush qatnashchisi sifatida meni turli tashkilotlar, qoʻni-qoʻshnilar doimo yoʻqlab turadi. Inson qadri ulugʻlangan yurtda yashayotganimiz uchun har qancha shukrona aytsak arziydi.

Nurbek Abdullaev,

“Adolat” SDP Namangan viloyat Kengashi matbuot kotibi.