Urganch shahar Kengashi sessiyasiga masala kiritildi

Mamlakatimizda shaxsning barkamol kamol topishiga, oʻsib kelayotgan avlodning ijodiy qobiliyatlarini aniqlash va rivojlantirish, ularning boʻsh vaqtdan oqilona foydalanishiga yoʻnaltirilgan maktabdan tashqari ishlar tizimini tubdan takomillashtirish maqsadida bir qator amaliy ishlar qilinmoqda. Xususan, soha rivoji uchun xizmat qilayotgan huquqiy asos yaratilib, Oʻzbekiston Respublikasi Vazirlar Mahkamasining “Maktabdan tashqari taʼlim tizimini yanada takomillashtirish chora-tadbirlari toʻgʻrisida” gi 2011-yil 28-fevraldagi 50-son qaroriga asosan “Barkamol avlod” bolalar maktabi toʻgʻrisidagi nizomga asosan hamda partiyaning “Vatan kelajagi yoshlar qoʻlida” loyihasi ijrosini taʼminlash maqsadida “Adolat” SDP Urganch shahar Kengashi deputatlari, faollaridan tarkib topgan ishchi guruh tomonidan shaharda faoliyat olib borayotgan “Barkamol avlod” bolalar maktabining moddiy-texnik bazasi taʼminoti hamda bugungi kunda markaz faoliyatiga toʻsiq boʻlayotgan muammolar, mavjud holatni yaxshilash boʻyicha olib borilgan oʻrganish ishlari natijalari Urganch shahar Kengashi sessiyasida muhokama etildi. Mazkur masala yuzasidan Urganch shahar Kengashi deputatlik guruhi rahbarining axboroti eshitildi.

Taʼkidlanganidek, “Barkamol avlod” bolalar maktab faoliyatiga toʻsiq boʻlayotgan muammolar, mavjud holatni yaxshilash boʻyicha markaz masʼullarining taklif va tavsiyalarini oʻrganish ishlari davomida bir qator takliflar olindi. Xususan, markaz toʻgarak mashgʻulotlari doirasida tuman, viloyat va respublika darajasidagi tadbirlar va musobaqalarni oʻtkazishda transport taʼminotida muammolar mavjud, zarurat boʻlganda umumiy foydalanish uchun balansda transporti yoʻq, transport sotib olish nizomda belgilanmagan. Bundan tashqari markaz xodimlarining oylik maoshi xalq taʼlimi tizimidagi oʻqituvchilar maoshidan past razryadda boʻlganligi sababli yetarli bilim va tajribaga ega boʻlgan kadrlar tanlab olish va ularni joy-joyiga qoʻyish ishlarini qoniqarli ahvolda deb boʻlmaydi, bu ayniqsa texnik-ijodiyot toʻgaraklarida oʻz taʼsirini koʻrsatmoqda.

Markazda toʻgarak mashgʻulotlarini oʻtkazishga asosan umumtaʼlim maktablari, akademik litseylar va kasb-hunar kollejlari oʻqituvchilari oʻtilgan mashgʻulotlar hajmiga proporsional ravishda soatbay haq toʻlagan holda shartnoma asosida jalb etilishi nizomda belgilab qoʻyilgan boʻlsa-da bugungi kunda Markaz xodimlarining oylik maoshi xalq taʼlimi tizimidagi oʻqituvchilar maoshidan past razryadda toʻlab berilmoqda. Shuningdek, zarur hollarda, tegishli pedagogik maʼlumotga ega boʻlmagan, ammo kasbiy tayyorgarlikka va yuksak axloqiy sifatlarga hamda “Usta”, texnik va sayyohlik sohasi boʻyicha “Sport ustasi” yoki “Sport ustaligiga nomzod” maqomiga ega boʻlgan shaxslar ham Markazda pedagogik faoliyat bilan shugʻullanishga jalb qilinishi mumkin, lekin bunday kadrlarga ham oylik maoshi past razryadda boʻlganligi sababli markaz malakali kadrlarga boʻlgan oʻz ehtiyojini qondira ololmay kelmoqda. Yuqoridagi oʻrganish natijalari boʻyicha taqdim etilgan maʼlumotlardan kelib chiqib, Oʻzbekiston “Adolat” SDP ning Xalq deputatlari Urganch shahar Kengashidagi partiya guruhining tashabbus va takliflarini inobatga olib, Xalq deputatlari Urganch shahar Kengashi quyidagicha qaror qabul qildi.

Koʻrilgan mazkur masala yuzasidan, “Adolat” SDP ning Xalq deputatlari Urganch shahar Kengashidagi deputatlik guruhi rahbarining axboroti maʼlumot uchun qabul qilindi. Shahardagi masʼul davlat tashkilotlari tomonidan va mansabdor shaxslar Urganch shahar hokimining Yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari N Matyakubov, shahar Xalq taʼlimi boʻlimi rahbari M Madraimov, shahar Moliya boʻlimi rahbari J Sapayev, shahar “Barkamol avlod” bolalar maktabi rahbari Sh Babajanovlar mavjud muammo va kamchiliklarni bartaraf etish boʻyicha alohida chora-tadbirlar dasturini bir hafta muddatda ishlab chiqish va dastur ijrosi boʻyicha hal etilishi zarur boʻlgan takliflar berilishini taʼminlash hamda Xalq deputatlari Urganch shahar Kengashining “Yoshlar siyosati va sogʻlom avlod masalalari” va “Mahalliy byudjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari” boʻyicha doimiy komissiyalariga yilning har choragida axborot taqdim etib borish vazifasi yuklatildi.

Mazkur qaror bajarilishini nazorat qilish Xalq deputatlari Urganch shahar Kengashining Ijtimoiy madaniy sohani rivojlantirish,oila, xotin-qizlar va Yoshlar masalalari boʻyicha doimiy komissiyalari zimmasiga yuklatildi. Kun tartibidan koʻrilgan masala sessiya qarori bilan amaliyotga yoʻnaltirildi.

Rustam Boltaev,

“Adolat” SDP

Urganch shahar Kengashi raisi, deputatlik guruhi rahbari