Urganch shahrida serqirra ijodkor, yosh adolatchimizning “Men ” nomli   tasviriy ijod ishlari koʻrgazmasi boʻlib oʻtdi

Kuni kecha Urganch shahridagi Respublika zamonaviy sanʼat muzeyida Kimyo Xalqaro Universitetining rangtasvir boʻlimi talabasi, partiya qoshida tashkil etilgan “Isteʼdod” klubining faol aʼzosi, “Adolat doʻppisi” sovrindori, yosh adolatchi Gulasal Qoʻchqorovaning “Men” deb nomlangan tasviriy ishlar koʻrgazmasining namoyishi boʻlib oʻtdi.

Tadbirga partiya faollari, deputatlari, yosh va ustoz musavvirlar, shoir, dramaturglar, ommaviy axborot vositalari vakillari hamda keng jamoatchilik ishtirok etdi. Tadbirni Galereya rahbari Shirin Tashova ochib berdi. Unda iqtidorli yoshlarga davlatimiz tomonidan qaratilgan eʼtibor toʻgʻrisida gapirdi.

Soʻng rassomchilik boʻyicha Gulasal Qoʻchqarovaga saboq berib kelgan ustozlardan Shavkat Usmanov, Soliy Qadirov soʻzga chiqib, yosh musavvirning yoshligidan nafaqat badiiy adabiyotga balki, rasm chizishga iqtidori borligi haqida gapirdi va   kelajakda yanada ajoyib asarlar yaratishiga umid bildirdi.

Tadbirda “Adolat” SDP Xorazm viloyati kengashi matbuot kotibi, Oʻzbekiston jurnalistlar ijodiy uyushmasi aʼzosi, shoira Zamira Abdullayeva soʻzga chiqib, partiyamiz tomonidan iqtidorli yoshlarni qoʻllab-quvvatlashga doir koʻplab tashabbuslar hayotga tatbiq etilgani toʻgʻrisida soʻz yuritdi. Shuningdek,   G.Qoʻchqarova partiya qoshidagi “Isteʼdod” klubning eng faol aʼzosi va serqirra qobiliyat egasi ekani, partiya siyosiy Kengashi tomonidan rasm chizish boʻyicha tashkil etilgan koʻrik-tanlovlarda munosib oʻrinlarni egallagani va yosh adolatchi sifatida tengdoshlariga namuna boʻlib kelayotgani toʻgʻrisida taʼkidladi.

Viloyat kengashi mutaxassisi Gulora Ismailova, koʻpgina asarlar muallifi shoir Komiljon Madraimov, shoira Qurbonbika Oʻrazmetovalar ham soʻzga chiqib, oʻzlarining fikr- mulohazalarini bildirdilar. Gulasal Qoʻchqarova, yosh musavvir:– Bugun hayotimda eng unutilmas kun desam mubolagʻa emas. Koʻrgazmam sabab, menga vaqtini ayamasdan tashrif buyurgan ustozlarimning suhbat va duolarini oldim. Ayniqsa, doim meni qoʻllab quvvatlab kelgan partiyam tomonidan tashakkurnoma bilan taqdirlanganim, ustozlarim tomonidan bildirilgan iliq fikr va munosabatlari meni yana yangi marralar sari undaydi. Bugun partiyaga aʼzo boʻlish istagim ham amalga oshdi. Partiya faollariga, ustozlarimga minnatdorlik bildiraman.

Yosh adolatchimiz toʻgʻrisidagi eʼtiborimni tortib kelayotgan bir jihatni juda hurmat qilaman, -deydi Zamira Abdullayeva. – Mashgʻulotlarga, tadbir va koʻrik tanlovlarga doim Gulasalning buvisi yetaklab keladi, partiyadoshimiz, bir nechta kitoblar va romanlar muallifi Maryam Begimova doim uni qoʻllab-quvvatlab, yoʻl-yoʻriq koʻrsatib keladi.

Ushbu koʻrgazmadan joy olgan har bir asarimning oʻz yaratilish tarixi bor,   har birini ona tabiat qoʻyniga chiqib, togʻ-u toshlar oralab yurib chizganman, bunda, albatta qiyinchiliklar boʻlgan, — deydi yosh adolatchimiz OAV vositalariga bergan intervyusida.

Bir soʻz bilan aytganda, serqirra ijodkor Gulasal Qoʻchqarova kabi yuragi yoniq yoshlar Yangi Oʻzbekistonimizning yangi hayotida munosib oʻrinni egallashlari shubhasizdir.

             Maryam Begimova,

        “Isteʼdod” klubi rahbari,

        Oʻzbekiston Yozuvchilar uyushmasi aʼzosi, shoira.