Ustoz otangdek ulugʻ..emasmi?

Shu kunlarda yurtimiz ijtimoiy tarmoqlarida turlicha talqin etilayotgan maktab oʻqituvchilari kaltaklangani aks etgan videoni koʻrib, 25 yil mobaynida bitta jamoada, bitta maktabda direktor boʻlib faoliyat yuritgan davrim yodimga tushdi...

Mamlakatimizda oʻqituvchining jamiyatdagi maqomi, obroʻsini yanada oshirishga qaratilgan oʻzgarishlar, hatto yangilanayotgan konstitutsiyamizda ham oʻqituvchilar shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qilish majburiyatini davlat oʻz zimmasiga olganligi normasi muhrlab qoʻyilmoqda. Davlatimiz oʻqituvchining himoyasi uchun oʻz majburiyatini kuchaytirayotgan bir vaqtda mazkur kasb egalari bilan sodir boʻlayotgan bunday salbiy holatlar kishi dilini gʻash qiladi.

Albatta, yuqoridagi holatda eng katta aybdor oʻz jahlini jilovlay olmagan, jismonan “ojiza” deb atalmish ayollarga qoʻl koʻtara oladigan darajada nomard, erkak oʻqituvchi. Huquqni muhofaza etish organlari tomonidan bu erkakka nisbatan tegishli baho beriladi, albatta. Aslida, maktab rahbarining birinchi vazifasi taʼlim maskanida sogʻlom muhit yarata olish, oʻqituvchilarni zamonaviy metodlar asosida oʻquvchilarga sifatli taʼlim-tarbiya berishga ragʻbatlantirish. Ushbu jamoada esa aksi, sogʻlom muhit yaratilmagan. Axir maktablarimiz maʼnaviyat beshigi, ilm-maʼrifat beshigi emasmi, bunday nosogʻlom muhit shakllangan jamoada oʻquvchilarimiz odob-axloqni, maʼnaviyat- maʼrifatni kimdan oʻrgansin. Muxtasar qilib aytganda, maktab va maktabgacha taʼlim muassasalari boshqaruv organlari mutasaddilari mazkur jamoa muhitini sogʻlomlashtirish chora-tadbirlarini koʻrishi lozim.

Muzaffara Abdiyeva,

Oliy Majlis Qonunchilik palatasi deputati.