Ustozlarga cheksiz ehtirom

Ustoz... Murgʻak qalblarga cheksiz orzularni baxsh eta olgan, ezgulikning poklik yoʻllariga etaklab, dunyoning sirli olami sari etaklagan ва sabr-u qanoatda cheksiz insonlar bu — ustozlarimizdir. Ularni har qancha qadrlasak kamdek goʻyo.

“Adolat” SDP Fargʻona viloyat Kengashi 1 –oktyabr oʻqituvchi va murabbiylar kuni arafasida yana bir xayrli tadbirga bosh boʻldi. Koʻngil toʻridagi ustozlarga ayta olmagan samimiy iqrorlarni aytish imkoniyati va bu harakatni har bir dillarga solish maqsadida Fargʻona Davlat Universiteti, Fargʻona shahridagi “Ibratli bekam” oʻquv markazi va shahardagi oʻz nufuziga ega “Baraka” savdo markazi jamoasi bilan hamkorlikda “Ustoz mening taʼrifimda” nomli insholar koʻrik tanlovi tashkil etildi.

Yuzlab dil izhorlari orasidan saralab olingan 40 nafar ijodkor talabalarning mehrlari muhrlangan insholarning orasidan gʻoliblarni tanlash oson kechmadi.Tanlovning taqdirlash marosimi ham tantanali nishonlandi. Tanlov gʻoliblari Nazokatxon Alieva, Muhayyoxon Abdulazizjonova, Odinaxon Abdusamatova hamda Madina Abbocxonovalarga “Adolat” SDP Fargʻona viloyat kengashining maxsus diplomlari va homiylarning qimmatbaho sovgʻalari va bepul oʻqish imkoniyatini beruvchi sertifikatlar topshirildi.

Aziz ustozlar! Barchangizga bayram muborak boʻlsin!    

“Adolat” SDP

Farg’ona viloyat kengashi Matbuot xizmati.