Vatan va millatni sevgan ajdodlarimiz

“Adolat” SDP Qamashi tuman Kengashi tomonidan tuman yoshlar markazi tadbirgohida   yoshlarning mamlakatimizda olib borilayotgan islohotlarga daxldorlik hissini kuchaytirish, Vatanga muhabbat ruhida tarbiyalash maqsadida “Maʼrifatparvar ota-bobolarimiz, ularning millat ravnaqi, Vatan taraqqiyoti yoʻlidagi ezgu faoliyati yoshlar nigohida” mavzusida tadbir tashkil etildi.

IX-XII hamda XIV-XVI asrlardagi Uygʻonish davrida Oʻzbekistonda ilm maʼrifat hamda madaniyat va maʼnaviyat bir-biriga bogʻliq holda – oʻzaro uygʻun, bir-birini toʻldirib-boyitib yuzaga chiqqan. Tibbiyot sohasini   Ibn Sino qanchalik chuqur bilsa, Navoiy adabiyot yoʻnalishida xuddi shunday muvaffaqiyatga erishgan. Bundan tashqari, Navoiy hazratlari nafaqat sheʼriyat, balki ilmi nujum – astronomiya fanining ham katta bilimdoni boʻlganini alohida qayd etish lozim. Tadbirda kun tartibidagi masala yuzasidan maʼruza qilgan xalq deputatlari viloyat Kengashi deputati Muhabbat Sharapova shular xususida toʻxtaldi.

Bu yil serquyosh mamlakatimizda Prezidentimizning   “Buyuk mutafakkir va qomusiy olim Abu Rayhon Beruniy tavalludining 1050 yilligini xalqaro miqyosda keng nishonlash toʻgʻrisida”gi qaroriga asosan YUNESKO shafeligida keng nishonlanadi,-dedi Muhabbat Sharapova.-Shunga asosan, hozir butun dunyo boʻylab “Buyuk Beruniy merosi” xalqaro sayyohlik marshrutlari yoʻlga qoʻyildi. Mamlakatimizda ham joriy yil yakunigacha Qoraqalpogʻiston Respublikasi Beruniy tumanida Abu Rayhon Beruniy majmuasi barpo etiladi. Shu kecha kunduzda alloma bobomiz ilmiy-ijodiy merosiga mansub qoʻlyozma va boshqa madaniy boyliklar har tomonlama oʻrganilyapti hamda restavratsiya qilina boshlandi.

-Darhaqiqat qaysi davlat, qaysi jamiyat boʻlishidan qatʼiy nazar jamoat aʼzolari maʼnaviy jihatdan har tomonlama baquvvat, bilimdon, mehr-oqibatli boʻlsa, shu davlatda tinchlik, farovonlik, xalq hayotida taraqqiyot boʻlaveradi,-dedi partiya faoli Saodat Otaqulova.- Shunday ekan, Yangi Oʻzbekistonni barpo etish yoʻliga oʻtgan bizning xalqimiz maʼrifat va maʼnaviyat masalalariga, xususan, maʼnaviyatga, maʼnaviy tarbiyaga jiddiy eʼtibor bermoqda. Prezidentimiz boshchiligida maktab va maktabgacha taʼlimda keng qamrovli islohotlar olib borilayotgani buning yorqin dalilidir. Yoshlarni siyosiy gʻoyaviy hamda maʼnaviy jihatdan chiniqtirish, dunyoqarashi endigina shakllangan yosh avlod qalbida milliy gʻurur tuygʻularini kuchaytirishni, Vatan, Millat va Istiqlol tushunchalarini qadriyat darajasiga koʻtarish borasidagi qator taʼsirchan tadbirlarni izchil amalga oshirishni davr taqozo etmoqda.

Jonajon vatani va millatini chin dildan sevgan bobolarimiz tafakkuri mahsuli boʻlgan tarix, adabiyot, sanʼat, axloq, falsafa, tibbiyot, matematika, kimyo, astronomiya, meʼmorlik, din va boshqa sohalarga oid koʻplab noyob qoʻlyozmalar jafokash oʻzbek xalqining bebaho boyligidir.Haqiqatdan ham bunday boy merosga ega boʻlgan xalq dunyoda kamdan-kam topiladi. Bizning vazifamiz unib oʻsib kelayotgan bugungi avlod tafakkurida ota-bobolarimiz qoldirib ketgan boy maʼnaviy ilm chashmasini chuqurroq singdirishdan iborat. Tadbirda shu masalalar xususida ilmiy izlanishlar olib borayotgan yosh olimlar maʼruzalari ham tinglandi. Yoshlardan tushgan savollarga masʼullar tegishlicha javob qaytardilar.

Gulnoza Radjabova,

“Adolat” SDP Qashqadaryo viloyat Kengashi raisi oʻrinbosari.