Xalq manfaati yoʻlida birlashgan siyosiy kuch ulkan ishlarga qodir

Bugun Oʻzbekiston “Adolat” sotsial-demokratik partiyasi Siyosiy Kengashi raisi Bahrom Abduhalimov sohada olib borilayotgan ishlar, erishilgan yutuqlar va mavjud muammolarni oʻrganish maqsadida partiyaning Samarqand viloyat Kengashiga tashrif buyurdi. Samarqandlik adolatchilar bilan uchrashuv tashkil etildi.

Uchrashuvga partiya viloyat Kengashi xodimlari, shahar va tuman Kengashi raislari, boshlangʻich partiya tashkiloti, “Ayollar qanoti”, “Yoshlar qanoti” raislari hamda deputatlar ishtirok etishdi. Tadbir davomida partiya yetakchisi partiya xodimlari bilan dildan suhbat qurdi. Partiya hududiy kengashi tomonidan joriy yilning oʻtgan davri davomidagi faoliyati muhokama etildi. Unda Kengash raislarining hisobotlari tinglandi.

Yigʻilishda Partiya Siyosiy Kengashning topshirigʻiga hamda joriy yil uchun ishlab chiqilgan rejaga asosan partiya loyihalari doirasida olib borilayotgan ishlar xususan, mafkuraviy yoʻnalishda partiya loyihalari doirasida oʻtkazilayotgan tadbirlarning sifati, samaradorligiga katta eʼtibor qaratishga, ommaviy axborot vositalari, ijtimoiy tarmoqlar orqali partiya maqsad va gʻoyalarini keng ommaga yetkazishga, partiyaga aʼzo qilishga, aʼzolik badallari, boshlangʻich partiya tashkilotlari faoliyatini yanada jonlantirishga, “Ayollar qanoti” va “Yoshlar qanoti”, deputatlar va deputatlik guruhlarining ishchanlik darajasi va faolligini oshirishga qaratilgan chora-tadbirlar xususida batafsil soʻz yuritilib, tegishli vazifalar belgilandi.

Siyosiy kuch yetakchisi Bahrom Abduhalimov oʻz soʻzida olib borilayotgan faoliyatimizning samaradorligi eng birinchi vazifa ekanligi, bir maqsad yaʼni, xalq, tashkilot manfaati yoʻlida bir jamoa boʻlib, siyosiy tashabbuskorlikni namoyon etib ishlash zarurligini qayd etib oʻtdi.

Muloqot davomida partiya mahalliy Kengashlari tomonidan amalga oshirilgan ijobiy ishlar bilan bir qatorda faoliyatida yoʻl qoʻyilgan kamchiliklar ham oʻrtaga tashaldi. Siyosiy faol, tashabbuskor kengash raislarining ish faoliyati eʼtirof etilib, oʻzaro tajriba almashinuv uchun oʻziga xos muhit yaratildi.

Anvar Rahmatov, partiya Oqdaryo tuman Kengashi raisi: – bugun partiyamizning Siyosiy Kengashi raisi Bahrom Abduhalimov bilan boʻlib oʻtgan uchrashuv samaradorligi, aniq maqsadga yoʻnaltirilganligi bilan har birimizga yanada shijoat va ishchanlik kayfiyatini bagʻishlash bilan bir qatorda, zimmamizdagi masʼuliyat hissini yanada chuqurroq anglatdi. Partiyamizning oʻz oldiga belgilab olgan gʻoyaviy maqsad va vazifalarni deyarli koʻpchiligi hayotga tatbiq etilgani, etilayotgani barchamizni quvontirdi. Partiyamiz tashabbusi bilan amalga oshirilayotgan islohotlarda har bir partiya faolining, shu qatorda mening ham partiya raisi sifatida munosib oʻrnim borligini dildan his etdim. Imkoniyatim, kuch-gʻayratimni partiyamiz rivoji orqali mamlakatimiz taraqqiyoti uchun safarbar etishni, sidqidildan mehnat qilishni maqsad qildim.

Zuhra Quddusova, xalq deputatlari Samarqand tuman kengashi deputati: — jadal rivojlanib borayotgan mamlakatimizda davlatimiz rahbari boshchiligida aholini hayotdan rozi qilish, inson huquqlarini oliy qadriyat darajasida bilib, manfaatlarini himoya qilish borasida tizimli ishlar olib borilmoqda. Tabiiyki, bu jarayonlar biz siyosiy kuch faollaridan, deputatlardan fidoiylik, faollikni talab etadi. Bugungi uchrashuv davomida partiyamiz Siyosiy Kengashi Bahrom Abduhalimov tomonidan yuqoridagi masalalarga eʼtibor qaratilib, faolligimizni yanada oshirish, bir maqsad yoʻlida jipslikda harakat qilish lozimligi taʼkidlandi. Uchrashuvdan oʻzimizga tegishli xulosalarni oldik. Bu uchrashuv biz deputatlarni saylovchilarga, elektoratimizga bergan vaʼdalarimizni vijdonan sarhisob qilishga undadi. Endigi faoliyatimizni yangi bosqichga koʻtarish, hududiy va mahalliy kengashlari bilan yanada samarali hamkorlikni yoʻlga qoʻyish, belgilangan vazifalar ijrosini sidqidildan, toʻlaqonli taʼminlash borasida zarur chora-tadbirlarni belgilab oldik.

Uchrashuv davomida partiya Siyosiy Kengashi raisi Bahrom Abduhalimov partiya Samarqand viloyat Kengashi faoliyati yuzasidan samimiy fikrlarini bildirar ekan, partiyaviy gʻoya va maqsadlarni amaliyotga keng joriy etilishida yanada qatʼiyat, siyosiy faollik bilan harakat qilishimiz, siyosiy maydonda oʻz oʻrnimizga ega boʻlishmiz kerak deya samimiylik bilan Samarqandlik adolatchilarga qilgan daʼvati har bir partiya xodimi zimmasiga chuqur masʼuliyat yukladi, ulkan maqsadlar sari undadi.

Lola Sayidova,

 “Adolat” SDP Samarqand viloyat Kengashi raisi oʻrinbosari.