Xalq muammolariga yechimlar topib...

Deputat xalq vakilidir, u xalq va saylovchilar manfaatini koʻzlaydigan, haqiqatan ham xalq dardi bilan yashaydigan inson boʻlmogʻi darkor. Zotan, deputat har doim xalq bilan boʻlishi, hamnafas faoliyat yuritishi lozim. Xalq deputatlari Tayloq tumani kengashi deputati Nilufar Akramova “Adolat” qabulxonasida fuqarolar bilan uchrashuv oʻtkazdi. Uchrashuv davomida deputat murojaatlar yuzasidan fuqarolarga tushuntirish ishlari olib bordi. Asosan koʻrilgan masalalar ishsizlik, uy-joy muammosi hamda oʻzini-oʻzi band qilish bilan bogʻliq boʻldi.

Jarayonda fuqaro Jumayeva Shoira ishsizligi sabab ish topishda yordam soʻrab murojaat qilgan boʻlsa, fuqaro Nizomova Gulshan oʻz-oʻzini band qilish maqsadida kredit olishda amaliy yordam soʻrab murojaat qildilar.

Koʻtarilgan masalalarni deputat oʻz nazoratiga oldi. Fuqarolarning murojaatlari boʻyicha tegishli tashkilotlarga deputatlik soʻrovlari yuborilib, qanoatlantirildi.

Akbar Erkayev,
“Adolat” SDP Samarqand viloyat Kengashi ijrochi kotibi.