Xalq va armiya – bir tanu bir jon!

Oʻzbekiston “Adolat” SDP Qashqadaryo viloyat Kengashi tomonidan Qarshi shahridagi “Vatanparvarlar” bogʻida “Xalq va armiya – bir tanu bir jon!” mavzusida tadbir boʻlib oʻtdi. Unda partiya faollari, deputatlar, ota-onalar, yoshlar, harbiylar, keng jamoatchilik va ommaviy axborot vositalari vakillari qatnashdi. Tadbirda xalq deputatlari viloyat Kengashi deputati Ruiddin Raupov maʼruza qildi.

— Dunyoda ulugʻ va sharafli kasblar koʻp, — dedi Ruiddin Raupov. — Ana shular orasida eng sharaflisi va mashaqqatlisi oʻz ona Vatani va xalqining tinchligi uchun xizmat qilishdir. Bugungi kunda Qurolli kuchlarimiz ming-minglab oʻgʻlonlarimiz uchun chinakam mardlik, fidoyilik, haqiqiy vatanparvarlik hamda matonat maktabiga aylangani, hech shubhasiz, shu yoʻlda erishgan eng katta yutugʻimizdir. Bu haqiqatni jonajon yurtimizdagi barcha ota-onalar, qolaversa, butun xalqimiz gʻurur bilan, minnatdorchilik bilan eʼtirof etmoqda.

— Hozirgi kunda biz kabi onalar oʻz farzandlarini harbiy xizmatga qoʻrquv aralash koʻzda yosh, yurakda ming bir xavotir bilan emas, balki mening oʻgʻlim haqiqiy Vatan himoyachisi boʻladi, deb, yuksak umid hamda ishonch va faxr tuygʻusi bilan kuzatmoqda, — deydi Oʻzbekiston Qahramoni, viloyat Kengashi deputati Muhabbat Sharapova. — Mustaqil yurtimizda boʻlgani kabi viloyatimizda ham ofitserlar va serjant kadrlarni tayyorlash hamda malakasini oshirishning zamonaviy talablarga javob beradigan samarali tizimi yaratildi. Birgina Qarshi shahridagi Serjantlar tayyorlash dargohida har yili yuzlab har tomonlama jangovar tayyorgarliklarga qodir boʻlgan yoshlar tayyorlanyapti.

Tadbirda harbiy xizmatni oʻzining kasbi, Vatan va xalq oldidagi muqaddas burchi deb bilgan fidoiy oʻgʻlonlarimizni sharaflash, ularga ehtirom koʻrsatish har birimiz uchun ham qarz, ham farz ekanligi alohida taʼkidlandi.

Shuningdek, hozir dunyoning turli davlatlarida notinchlik, xavf-xatarlar, milliy va global xavfsizlikka qarshi tahdidlar tobora ortib borayotgan hozirgi murakkab davrda Qurolli Kuchlarimizning jangovar salohiyatini yuksaltirish, uning moddiy-texnik bazasini mustahkamlash, eng zamonaviy qurol-yarogʻ va aslahalar bilan taʼminlash, harbiy xizmatchilarning jismoniy, maʼnaviy-intellektual tayyorgarligini oshirish, ijtimoiy himoyasini kuchaytirish eng ustuvor vazifa boʻlib qolayotganligi eʼtirof etildi. Bu borada ayniqsa, muhtaram yurtboshimiz rahbarligida olib borilayotgan ishlar diqqatga sazovordir. Ayni paytda davlatimizning harbiy-siyosiy masalalar boʻyicha qatʼiy pozitsiyasini ifoda etadigan yangi Mudofaa doktrinasi ishlab chiqildi. Barcha jabhada jumladan, Qurolli kuchlarimiz tizimida amalga oshirilayotgan tub islohotlar natijasida milliy armiyamiz har tomonlama tezkor va ixcham, har qanday qarshilik, tahdidlarga munosib zarba berishga qodir boʻlgan jangovar kuchga aylanib bormoqda. Bizning asosiy vazifamiz har bir harbiy xizmatchining professional bilim va malakasi, aqliy salohiyati, ruhiy tayyorgarligini oshirish, ularda vatanparvarlik fazilatlarini kamol toptirishga oʻz hissamizni qoʻshishimiz kerak.

Serquyosh mamlakatimizda tinchlik, osoyishtalik, xalqimiz hayotida esa farovonlik hukm surmoqda. Bunda albatta, fuqarolarning konstitutsiyaviy huquq va erkinliklarini kafolatlash hamda himoya qilishda Qurolli Kuchlarimiz, xavfsizlik va huquqni muhofaza qiluvchi idoralarning oʻrni va ahamiyati tobora ortib bormoqda. Tadbirda soʻz olganlar shular xususida mulohaza yuritishdi.

Tadbirda partiya faollari barcha ishtirokchilarni Oʻzbekiston Qurolli Kuchlari tashkil etilganining shonli 31 yilligi va Vatan himoyachilari kuni bilan samimiy tabriklashdi.

Milliy armiyamiz saflarida sharafli xizmatini oʻtayotgan askarlar olqishlandi.

Uchrashuvda muqaddas Vatanimiz sarhadlarini sadoqat bilan qoʻriqlab,  mardonavor xizmat qilishdan hech qachon charchamang, mard va jasur Vatanimiz posbonlari, — deya xitob qilindi.

“Adolat” SDP Qashqadaryo viloyat

kengashi Matbuot xizmati.