“Xalqaro avtomobilsiz kun” munosabati bilan velomarafon musobaqasi tashkil etildi

“Adolat” sotsial-demokratik partiyasining dasturiy-maqsadlarida aholi, ayniqsa yoshlar oʻrtasida sogʻlom turmush tarzini yanada ommalashtirishga, jismoniy-tarbiya va sportni rivojlantirishga birlamchi vazifa sifatida eʼtibor qaratilgan.

Shu bois, bugun, 22-sentyabr — “Xalqaro avtomobilsiz kun” munosabati bilan poytaxtimizda joylashgan 22-sonli Mehribonlik uyida “Adolat” SDP, Toshkent shahar boʻyicha Milliy gvardiya boshqarmasi hamda Toshkent shahar IIBB Yoʻl harakati xavfsizligi boshqarmasi hamkorligida oʻtkazilgan velomarafon musobaqasi partiyaning maqsad va gʻoyalarini keng targʻib qilishga xizmat qildi.

Tadbir doirasida Mehribonlik uyi tarbiyalanuvchilari bilan oʻzaro davra suhbati ham tashkil etildi. Unda ayni davrda texnika va texnologiyalarning rivoji natijasida dunyoda kam harakatlilik, semizlik va boshqa turli xastaliklar koʻpayib borayotganligi, shu boisdan insonlarni piyoda harakatlanishga chorlash, yoshlarning jismoniy faolligini oshirish, ularni turli xil sport turlariga kengroq jalb qilish, qolaversa, avtomobillardan chiqadigan zaharli gazlar miqdorini biroz boʻlsa-da kamaytirish evaziga atrof-muhit tozaligiga hissa qoʻshish lozimligi taʼkidlandi.

Shu bilan birgalikda, yoʻl harakati qoidalari, yoʻllarda harakatlanish xavfsizligi boʻyicha yoshlarga soha mutaxassislari partiya faollari tomonidan tushuntirishlar berildi.

Tadbir yakunida jarayonlarda faol ishtirok etganlarga partiya va hamkor tashkilotlarning qimmatbaho esdalik sovgʻalari topshirildi.