“Xalqimiz yanada katta oʻzgarishlar va yangi tashabbuslarni kutyapti”

Davlatimiz rahbari Buxoro viloyatiga tashrifini, anʼanadagidek, Bahouddin Naqshband maqbarasini ziyorat qilishdan boshladi.

Qurʼon oyatlari tilovat qilindi. Alloh taolodan oʻtganlarga rahmat, yurtimizga tinchlik-farovonlik tilab duo oʻqildi.

Shu yerda majmua atrofida rejalashtirilayotgan qurilish-taʼmirlash loyihasi koʻrib chiqildi. Unga koʻra, Bahouddin Naqshband maqbarasiga Toqi miyona darvozasidan boruvchi tarixiy yoʻlakni tiklash, Doniyolbiy madrasasini taʼmirlash, tahoratxona va muzey barpo etish taklifi berildi.

Davlatimiz rahbarining ziyorat turizmi uchun sharoitlarni kengaytirish, xorijdan Buxoroga toʻgʻridan-toʻgʻri qatnovlar va zamonaviy mehmonxona tashkil etish boʻyicha koʻrsatmalar bergani kelajakda viloyatimiz ichki va tashqi turizimning yanada rivojlanishidan darak beradi. Bu mamlakatimiz iqtisodiyoti va mavqeyi oshishidan hamda yangi ish oʻrinlari yaratilishi uchun hissa qoʻshadi .

Prezidentimiz viloyatning Kogon tumanidagi “Siyovush tekstil” korxonasi faoliyati bilan tanishar ekan, — Bu Yangi Oʻzbekistondagi yangi yoʻnalish Yurtimizda toʻqimachilik sanoati rivojlanyapti. Agar korxonalar qoʻshilgan qiymat yaratib, daromadini oshiraman desa, qisman akril ishlatishiga toʻgʻri keladi. Undan tayyorlangan mahsulot qiymati 5 barobar oshadi. Bu — manfaatdorlik, barqarorlik, odamlarga ish oʻrni, degani. Shuning uchun davlat paxtani qayta ishlashga qancha koʻmakdosh boʻlgan boʻlsa, endi sunʼiy tola ishlab chiqarishga ham shunday yordam beradi , — dedi Shavkat Mirziyoyev.

Shu oʻrinda taʼkidlab oʻtish joizki, bu joy ilgari unumsiz, boʻsh turgan maydon edi. Tadbirkorlarga sharoit yaratish maqsadida hudud “Gʻijduvon” erkin iqtisodiy zonasiga kiritilib, zarur infratuzilma tortilgach, bu yerda sanoat vujudga keldi.

Xususan, “Siyovush tekstil” masʼuliyati cheklangan jamiyatining 36 million dollarlik loyihasi oʻtgan oyda ishga tushdi. Unda yiliga 40 ming tonna akril ip-kalava yigirish quvvati va 600 ta ish oʻrni yaratildi.

Hozirgi korxona loyihaning birinchi bosqichi boʻlib, ayni paytda xorijlik hamkorlar bilan korxona faoliyatini kengaytirish ustida ish olib borilmoqda. Rejaga koʻra, keyingi bosqichda akril tola hamda undan tayyor mahsulot ishlab chiqarish toʻliq mahalliylashtiriladi. Jami ish oʻrni soni 1 ming 200 taga yetadi.

Shuningdek, davlatimiz rahbari Buxoro viloyati Romitan tumanidagi Qahramon mahallasida boʻlib, xonadonlarga kirib, aholi turmushi bilan yaqindan tanishdi.

Bu yerda 3 ming 900 nafarga yaqin aholi yashaydi. Mahallaning drayveri hunarmandlik va issiqxona xoʻjaligi deyish mumkin. 200 gektar maydondagi issiqxonalarda bozorbop sabzavotlar yetishtirib sotiladi. Shuningdek, mebelsozlik, tikuvchilik, zardoʻzlik yaxshi rivojlangan.

Prezidentimiz shu yerlik Halil Qobilov va Gulbahor Toʻxtayevalar xonadonida boʻldi. Qoʻni-qoʻshnilar, oqsoqollar yigʻilib, samimiy davra qurildi.

Mahalla raisi hududdagi oʻzgarishlar, odamlar hayoti haqida soʻzlab berdi.

Mahallada oʻndan ortiq savdo doʻkoni, tikuvchilik ustaxonalari, mehmonxona va restoranlar bor. Ularda mahalliy yoshlar ishlab, daromad topmoqda. Umuman aytganda, mahallada ishsiz odam yoʻq, oʻtgan davrda bironta jinoyat sodir etilmagan.

“Obod mahalla” dasturi asosida infratuzilma yaxshilangan. Xususan, ichki yoʻllar asfaltlanib, pidyodalar yoʻlaklari qurilgan. Transformator oʻrnatilib, elektr tarmoqlari yangilangan.

Shavkat Mirziyoyev takidlaganidek bugungi kunda harakat qilgan oilaning biri ikki boʻlyapti. Xalqimiz bizga katta ishonch bildirdi. Yanada oʻzgarishlarni, yangi tashabbuslarni kutyapti. Bu juda yuksak masʼuliyatdir.

Davlatimiz rahbari mazkur tumanidagi “WBM Romitex” korxonasi faoliyati bilan tanish chogʻida, korxona miqyosi jihatidan ham, salohiyati jihatidan ham ulkan. Loyiha qiymati 93 million dollardan ziyod. Uning jami hududi 20, ishlab chiqarish maydoni 7 gektar. Turkiya va Germaniyadan ilgʻor uskunalar keltirib oʻrnatilgan. Shu tariqa, yiliga 25 ming tonna ip-kalava tayyorlash quvvati va 1000 ta ish oʻrni yaratilganligiga guvoh boʻldi.

Prezidentimiz taʼbiri bilan aytganda, bunday korxonaning boʻlishi quvonarli. Bunga davlat infratuzilma, mablagʻ, imkoniyat jihatidan koʻmaklashdi. Eng katta natija 1000 nafar xotin-qizlarimiz ishli boʻlganidir

Oʻzbekiston Prezidentining joriy yil 10-yanvardagi “Paxta-toʻqimachilik klasterlari faoliyatini qoʻllab-quvvatlash, toʻqimachilik va tikuv-trikotaj sanoatini tubdan isloh qilish hamda sohaning eksport salohiyatini yanada oshirish chora-tadbirlari toʻgʻrisida”gi farmoni bunday korxonalarga katta madad boʻldi. Jumladan, ularga revolver kreditlash asosida aylanma mablagʻ ajratilgani ishlab chiqarish barqarorligini taʼminladi.

Loyihaning ikkinchi bosqichida tayyor mato ishlab chiqarish koʻzda tutilgan. Muhimi, bu tufayli qishloq joyda 3 mingga yaqin ish oʻrni yaratiladi.

Prezidentimiz oʻz tashrifi davomida viloyatidagi yangi sanoat, xizmat koʻrsatish va ijtimoiy soha majmualari ishga tushirdi. Bular – Vobkent tumanidagi “Vobkent tola klaster”, Qorakoʻl tumanidagi “Qorakoʻl kumush kalava”, Qorovulbozor tumanidagi “Buxoro real moto”, Buxoro shahridagi “Ekvatorial Chodak”, Kogon shahridagi “Konchi” va “Prom tekstil”, Gʻijduvon va Peshku tumanlaridagi yogʻ-moy korxonalari, Buxoro shahridagi mehmonxona va Buxoro tumanidagi tibbiyot birlashmasidir.

Bir soʻz bilan aytganda, davlat rahbarining Buxoro viloyatiga tashrifidan xalqimiz yanada katta oʻzgarishlar va yangi tashabbuslarni kutyapti.

Homidov Maqsud Amonovich,

Xalq deputatlari Buxoro viloyat Kengashi deputati,

Oʻzbekiston “Adolat” SDP Buxoro viloyat Kengashi raisi.